ادامزات ءبىر-بىرىنە ايتىلعان ءۋاجدى ەستي الماعاننان زارداپ شەگىپ وتىر - راۆيل گاينۋتدين
بۇل تۋرالى ر ف مۇسىلماندارى رۋحاني باسقارماسىنىڭ ءتوراعاسى، رەسەي مۇفتيلەر كەڭەسىنىڭ ءتوراعاسى راۆيل گاينۋتدين ايتتى، دەپ حابارلايدى قازاقپارات ءتىلشىسى.
«ادامزات ءبىر-بىرىنە ايتىلعان ۋاجگە قۇلاق اسپاي، وسىنىڭ سالدارىنان زارداپ شەگىپ جاتىر. بۇل كەمشىلىك ادام تابيعاتىنا ءتان ەمەس. ءوزارا بايلانىستى قالپىنا كەلتىرىپ، بەيبىتشىلىكتى قورعاۋ ءۇشىن جەر بەتىندەگى ءتۇرلى پىكىرلەردى تىڭداۋىمىز كەرەك. ءبىز ءوزارا كەلىسىم جولىمەن ءجۇرۋىمىز كەرەك»، - دەدى ر. گاينۋتدين الەمدىك جانە ءداستۇرلى دىندەر ليدەرلەرىنىڭ VII سەزىندە.
ونىڭ ايتۋىنشا، قازىرگى كەزدە ادامزات وزگەرىستەرگە تولى كەزەڭدە ءومىر ءسۇرىپ جاتىر. بەيبىتشىلىك پەن ادامگەرشىلىك باعىتىنداعى ۋاعىزداردىڭ قازىرگى سانسىز شيەلەنىستەردىڭ الدىن الا الماعانى وكىنىشتى جاعداي.
«بارلىق ىزگى نيەتتى ادامزات، ءدىن كوشباسشىلارى الەمدەگى بەيبىتشىلىك ءۇشىن دۇعا ەتۋى كەرەك. وسى بەيبىتشىلىك قۇندىلىعىن ۋاعىزبەن، وسيەت ارقىلى جاقىنداتۋ ماڭىزدى»، - دەدى رەسەي مۇفتيلەر كەڭەسىنىڭ ءتوراعاسى.
ونىڭ پايىمىنشا، قازىرگى قاقتىعىستاردىڭ تۇپكى سەبەبىن حالىققا جەتە ءتۇسىندىرۋ كەرەك.
بۇدان بۇرىن حابارلانعانداي، ەلورداداعى تاۋەلسىزدىك سارايىندا الەمدىك جانە ءداستۇرلى دىندەر ليدەرلەرىنىڭ VII سەزى ءوتىپ جاتىر.
قازاقستان پرەزيدەنتى قاسىم-جومارت توقايەۆ ءدىن كوشباسشىلارىنىڭ ادامگەرشىلىك قۇندىلىقتاردى دارىپتەۋگە قوسقان ۇلەسىن اتادى.
