انتيكوردىڭ ارالاسۋىنان سوڭ ىلە اۋدانىندا ۇيگە گاز كىرگىزۋ باعاسى ايتارلىقتاي ارزاندادى

نۇر-سۇلتان. قازاقپارات - ىلە اۋدانى قويانقۇس اۋىلىنىڭ تۇرعىندارى ۇيلەردى گازعا قوسۋ قۇنىنىڭ جوعارى ەكەنىن بىرنەشە رەت كوتەردى، دەپ حابارلايدى قازاقپارات ق ر سىبايلاس جەمقورلىققار قارسى ءىس-قيمىل اگەنتتىگىنىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتى تاراتقان اقپاراتقا قاراعاندا، اۋداندا گازداندىرۋدى «قازترانسگاز-ايماق» ا ق الماتى وندىرىستىك فيليالى جۇزەگە اسىرادى. كومپانيا ەلدى مەكەنگە دەيىن گازداندىرۋدى جۇرگىزەدى، ال اۋىلدارداعى ىشكى گاز قۇبىرلارىن وسىعان ارنايى ليسەنزياسى بار جەكە كومپانيالار قوسادى.

قويانقۇس اۋىلىندا «ەر-كاي» ج ش س كومپانياسى جۇمىس جۇرگىزەدى. ءار ۇيگە گاز قوسۋ تاريفى ولاردىڭ سمەتاسى بويىنشا 1 ميلليون تەڭگەگە دەيىنگى سومانى قامتيدى.

سىبايلاس جەمقورلىققا قارسى قىزمەت اۋداننىڭ جەرگىلىكتى اتقارۋشى ورگاندارىمەن بىرگە الماتى وبلىسىنىڭ گاز شارۋاشىلىعى وكىلدەرىمەن كەزدەسكەننەن كەيىن ماسەلە وڭ شەشىمىن تاپتى.

«قويانقۇس اۋىلىندا گازداندىرۋ بۇرىن جوسپارلانعاننان ەكى ەسە تومەن باعامەن - 425 مىڭ تەڭگەدەن جۇرگىزىلەدى. سونىمەن قاتار، اۋىل تۇرعىندارىنا گازدى قوسۋ باعاسىن ءبولىپ تولەۋ مۇمكىندىگى بەرىلدى»، - دەلىنگەن حابارلامادا.