ريم پاپاسى پاندەميادان كەيىنگى كەزەڭدەگى باسىمدىقتاردى اتادى

بۇگىن ەلورداداعى الەمدىك جانە ءداستۇرلى دىندەر ليدەرلەرىنىڭ VII سەزىندە ريم پاپاسى فرانتسيسك وسىلاي ايتتى، دەپ حابارلايدى قازاقپارات ءتىلشىسى.

«قازاق جەرىندە 20 جىلدان بەرى الەم ءۇشىن ماڭىزى زور وسى سەزد ۇيىمداستىرىلىپ كەلەدى. بيىلعى كەزدەسۋ ءبىزدى پاندەميادان كەيىنگى كەزەڭدە ادامزاتتىڭ رۋحاني، الەۋمەتتىك دامۋىنداعى ءرولى تۋرالى ويلانۋعا باعىتتاپ وتىر. پاندەميا نازار اۋدارعىم كەلەتىن ءتورت جاھاندىق پروبلەمانىڭ ىشىندەگى نەگىزگىسى بولىپ تۇر. بۇل بىزدەن جانە دىننەن ورتاق يگى نيەتتىڭ بولۋىن تالاپ ەتەدى. كوروناۆيرۋس بارشامىزدى ءبىر دەڭگەيگە ءتۇسىرىپ، بارلىعىمىز قاراپايىم ادام ەكەنىمىزدى ەسكە ءتۇسىردى. ۇلى اقىن ابايدىڭ شىعارمالارىنان وسى جايىندا تەرەڭ تۇسىنۋگە بولادى»، - دەدى ريم پاپاسى.

وسى ورايدا ول الەم ەلدەرىندە پاندەميا جايلاعان كەزدە بارشا ادامزات ءوزىنىڭ ءالسىز ءارى كومەككە مۇقتاج ەكەنىن سەزىنگەنىن ايتتى. سوندىقتان قازىرگى كەزدە ىنتىماقتاستىق بايلانىستاردى كەيىنگە ىسىرىپ قويا المايمىز. بارشامىزعا ورتاق كۇردەلى پروبلەمالاردى بىرلەسە شەشۋىمىز كەرەك.

«وسى ورايدا ءدىن بەيتاراپ قالماۋى ءتيىس. بۇل تۇرعىدا ءدىن العا جەتەلەپ، سىناق الدىندا ادامداردىڭ بىرلىگىنە قولداۋ تانىتۋى كەرەك»، - دەدى پونتيفيك.

ريم پاپاسى السىزدەردى تىڭداپ، حالىقتىڭ وسال توپتارىنا ءسوز بەرىپ، ورتاق ىنتىماقتاستىققا قولداۋ جاساۋعا شاقىردى. بۇل ماسەلە ءبىرىنشى كەزەكتە پاندەميا كەزىندە زارداپ شەككەن كەدەي ءارى مۇقتاج ادامدار قاتىستى بولىپ تۇر.