كوروناۆيرۋس كەزىندە قۇدايعا سەنىم كۇشەيە ءتۇستى - يزرايل راۆۆينى
نۇر- سۇلتان. قازاقپارات - ءدىن كوشباسشىلارى ءىس جۇزىندە ۇلگى بولىپ، ادامداردى جاقسىلىققا ۇيرەتۋى كەرەك. بۇل پىكىردى يزرايلدىڭ باس سەفارد راۆۆينى يتسحاك يوسيف ايتتى، دەپ حابارلايدى قازاقپارات ءتىلشىسى.
«كوروناۆيرۋس ارقىلى قۇدايعا دەگەن سەنىم كۇشەيە ءتۇستى، ويتكەنى ادامدار وزدەرىنە ەشتەڭە تاۋەلدى ەمەستىگىن، كىشكەنتاي ۆيرۋستى بىردە- ءبىر ساراپشى تۇسىنە المايتىنىن كوردى. مۇنىڭ ءبارى قۇدايدىڭ قولىندا. ءبارىمىز جاراتۋشىعا جالبارىنامىز، قاسيەتتى دۇعا ءبىزدى ىندەتتەردەن، سوعىستاردان قورعاپ، الەمدى سانالى جانە جاقسىراق ەتۋىن تىلەيمىز. جاراتۋشىنىڭ دۇعالارىمىزدى قابىل ەتۋى ءۇشىن نە ىستەي الامىز؟ اينالامىزعا كومەك كورسەتىپ، جامان ادەتتەردەن باس تارتۋ كەرەك»، - دەدى يتسحاك يوسيف الەمدىك جانە ءداستۇرلى دىندەر كوشباسشىلارىنىڭ VII سەزىندە.
راۆۆيننىڭ ايتۋىنشا، جاۋاپ رەتىندە مۇنىڭ ءبارىنىڭ قايتارىمى بولادى.
«ءدىن كوشباسشىلارى شىدامدىلىق، جۇمساقتىق، جامان ادەتتەردەن باس تارتۋ، شىدامدىلىق، ءبىر- بىرىنە قۇرمەت كورسەتۋدە ءىس جۇزىندە ۇلگى بولىپ، ادامداردى جاقسىلىققا ۇيرەتۋى كەرەك»، - دەپ تولىقتىردى راۆۆين.
ايتا كەتەيىك، بۇگىن ەلوردادا الەمدىك جانە ءداستۇرلى دىندەر ليدەرلەرىنىڭ VII سەزى ءوتىپ جاتىر. ەكى كۇنگە سوزىلاتىن سەزگە 50 ەلدەن 100 دەن استام دەلەگاتسيا، ونىڭ ىشىندە يسلام، حريستيان، بۋدديزم، يۋدايزم، يندۋيزم، داوسيزم، زورواستريزم، سينتويزم دىندەرىنىڭ وكىلدەرى، سونداي- اق ساياسي جانە قوعام قايراتكەرلەرى، حالىقارالىق ۇيىمدار مۇشەلەرى كەلگەن.
ءدىني فورۋمعا ريم پاپاسى فرانسيسك، ءال- ازحاردىڭ جوعارعى يمامى احمەد موحاممەد احمەد ات- تايەب، يەرۋساليم پاتريارحى III تەوفيل، اشكەنازدىڭ باس ءراۆۆينى داۆيد لاۋ، ءيزرايلدىڭ باس سەفارد ءراۆۆينى يتسحاك ءيوسيفتىڭ جانە باسقا دا ءدىني جەتەكشىلەر، سونداي- اق ءبىرقاتار حالىقارالىق ۇيىم وكىلدەرى قاتىسادى.
سونىمەن بىرگە، مەملەكەت باسشىسى قاسىم- جومارت توقايەۆ باس اشكەنازي راۆۆينى داۆيد لاۋ مەن باس سەفارد راۆۆينى يتسحاك ءيوسيفتى قابىلدادى. مەملەكەت باسشىسى يزرايل قازاقستاننىڭ تاياۋ شىعىستاعى ماڭىزدى سەرىكتەسى ەكەنىن اتاپ ءوتتى، سونداي- اق ساۋدا- ەكونوميكالىق ءىس- ارەكەتتەر جاندانىپ، مادەني- رۋحاني بايلانىستار دايەكتى تۇردە نىعايىپ كەلە جاتقانىن ايتتى. داۆيد لاۋ مەن يتسحاك يوسيف قازاقستاننىڭ كونفەسسياارالىق ديالوگتى نىعايتۋعا بەيىلدى ەكەنىنە، ءاردايىم ءدىني سەنىم بوستاندىعىن قولدايتىنىنا نازار اۋدارىپ، بۇل سالادا وزگە مەملەكەتتەرگە ۇلگى بولاتىنىن جەتكىزدى.
