استاناداعى جاڭا مەشىتتە جۇما كۇنى پايعامباردىڭ تىكەلەي ۇرپاعى ۋاعىز ايتادى

يمام يسلام قۇندىلىقتارىن اراب تىلىندە جۇرگىزەدى. ال ونى قازاق تىلىنە جەرگىلىكتى ماماندار سول ساتتە اۋدارىپ وتىرادى. ايتا كەتەيىك، احماد ات- تايەب ءبىزدىڭ ەلگە الەمدىك جانە ءداستۇرلى دىندەر كوشباسشىلارىنىڭ سەزىنە ارنايى كەلدى. جالپى، ءال- ازھار ۋنيۆەرسيتەتىنىڭ جوعارعى يمامى دارەجەسى - يسلام جەتەكشىلەرىنىڭ اراسىنداعى ەڭ بەلدى اتاق.

تاريحقا كوز جۇگىرتسەك، 1679 -جىلدان بەرى يسلامدا بار- جوعى 50 يمام بۇل اتاققا لايىق بولعان. ونىڭ ۇستىنە احماد ات- تايەب سوڭعى پايعامباردىڭ تىكەلەي ۇرپاعى. ول ساحابا ءالي يبن ءابۋ تاليب پەن فاتيما حاساننان تاراعان. قازىر باس مەشىتتە جۇما نامازىنا دايىندىق جۇمىستارى ءجۇرىپ جاتىر. سونىمەن قاتار، سەزدىڭ ءبىرقاتار دەلەگاتتارى جاڭا مەشىتتى كورىپ ءجۇر.

سەرىك احمەتوۆ، رەسپۋبليكالىق باس مەشىتتىڭ نايب يمامى:

- قوناقتاردىڭ كوپشىلىگى بىزگە ارنايى كەلىپ، سۇحباتتاسىپ جاتىرمىز. ودان كەيىن كەلىپ ارالاپ، تاماشالاپ جاتىر. بىزدە ارنايى الىپ ءجۇرۋشى بىرنەشە تىلدە گيدتاردى قويدىق. ولار اقپاراتتىق مەشىتتىڭ ساۋلەتىن تۇسىندىرەتىن بولادى. ودان كەيىن ءدىني باعىتتا ءبىز ءوزىمىز دە ارالاسىپ جۇرگىزىپ ءجۇرمىز.

جاڭا مەشىتكە قۇلشىلىق ەتۋگە كەلگەن جۇرتشىلىقتىڭ قاراسى قالىڭ. مۇندا كۇنىنە شامامەن 20 مىڭعا جۋىق جاماعات جينالادى. ونىڭ اراسىندا جەرگىلىكتى تۇرعىندار دا، تۋريستەر دە بار. ءزاۋلىم عيمارات ءوزىنىڭ ساۋلەتىمەن تارتىمدى. ءتىپتى مۇندا مۇسىلمان قاۋىم وتباسىلىق ماسەلەلەرىمەن دە كەلەدى. ول ءۇشىن الدىن الا يمامعا جازىلۋ كەرەك. مەشىتتەگى كونفەرەنسيا زالىندا بۇعان ارنالعان قوس بولمە بار.

- بۇل مەشىت دەيتىن ءبىزدىڭ رۋحاني بايلىعىمىز عوي، مۇسىلمان حالقىنىڭ رۋحاني بايلىعى. اللا تاعالانىڭ جەردەگى ءۇيى دەيدى عوي. وتكە كوركەم، وتە ادەمى.

- اكە- شەشەمىزگە دۇعا قىلىپ، وسى مەشىتكە كەلگەنبىز. جاقسى سالىنعان ەكەن. - شىمكەنتتەن كەلدىك، كورەيىك، بارىپ قۇران وقىتايىق دەپ. جاقسى، وتە تاماشا.

- استانانىڭ بايلىعىن وسى مەشىتتەن كورىپ جاتىرمىز عوي. كەرەمەت سالىنعان، دەمالۋعا، وتباسىمەن كەلىپ ءمىناجات قىلۋعا وتە كەرەمەت.

جالپى مەشىتتىڭ اۋماعى 10 گەكتاردى الىپ جاتىر. ءبىرىنشى جانە ەكىنشى قاباتتا ناماز وقيتىن ورىن، وقۋ بولمەلەرى، كونفەرەنس- زال، نەكە قيۋ زالى، قۇران وقيتىن بولمە جانە تەلەستۋديا بار. ءمىناجات ۇيىنە 235 مىڭ ادام سىيىپ كەتەدى. قازىر كەلۋشىلەر بالالارعا ارنالعان بولەك زال اشۋدى ۇسىنىپ وتىر. سونىمەن قاتار الداعى كۇندەرى الىپ مۇنارا تۋريستەرگە ەسىگىن اشادى.

www.24.kz