قاسىم-جومارت توقايەۆتى قولداۋ بويىنشا رەسپۋبليكالىق قوعامدىق قوزعالىس قۇرىلدى
قوعامدىق قوزعالىستى قۇرۋ جونىندەگى باستامانى مەرەكە قۇلكەنوۆ، رايىمبەك باتالوۆ، اقبەرەن ەلگەزەك، سەرگەي پونوماريەۆ، بەكنۇر قيسىقوۆ، داۋرەن قۋات، داۋلەتكەرەي كاپ ۇلى، ءادىل احمەتوۆ، نازگۇل قارابالينا، مارات شيبۇتوۆ جانە وزگە دە بەلگىلى قوعام، ساياسات، مادەنيەت جانە سپورت قايراتكەرلەرى، زيالى قاۋىم مەن بيزنەس-قوعامداستىق وكىلدەرى، قوعامدىق ۇيىمداردىڭ كوشباسشىلارى كوتەرگەن.
«جالپى، 2019-جىلى باستالعان پرەزيدەنت رەفورمالارى كەزەڭ-كەزەڭىمەن جۇزەگە اسىپ كەلەدى. «قايعىلى قاڭتار وقيعاسىنان» كەيىن قوعامدى دەموكراتيالاندىرۋ مەن ليبەرالداندىرۋ پروتسەستەرى قارقىندى جۇرۋدە. سوندىقتان ءبىز ازاماتتىق قوعام وسى وزگەرىستەردىڭ بەل ورتاسىنان تابىلۋى قاجەت دەپ سانايمىز. ءبىزدىڭ قوزعالىس ۇگىت-ناسيحات ءۇشىن ەمەس، پروتسەستەرگە قاتىسۋ ءۇشىن قۇرىلعان. ءبىز قازىر رەفورمالاردى قولداپ، وسى ماڭىزدى كەزەڭدى سوڭىنا دەيىن جەتكىزۋىمىز كەرەك»، - دەدى قازاقستان جازۋشىلار وداعى ءتوراعاسىنىڭ ءبىرىنشى ورىنباسارى اقبەرەن ەلگەزەك.
سونداي-اق ول پرەزيدەنتتى قولدايتىن قوعامدىق قوزعالىستىڭ زاڭدى ۇيىم ەمەس ەكەنىن ايتتى.
«قوعامدىق قوزعالىس ەشقانداي زاڭدى ۇيىم رەتىندە تىركەلگەن جوق. بۇگىنگى جيىنعا قاتىسۋشى ازاماتتار رەسپۋبليكانىڭ تۇكپىر-تۇكپىرىنەن جينالدى. الداعى ۋاقىتتا قاتارىمىزعا تۇراقتىلىق پەن جارقىن بولاشاقتى قولدايتىن باسقا دا ازاماتتار قوسىلادى دەپ سەنەمىز. ماقساتىمىز تۋعان جەرىمىزدى كوركەيتۋ، ەلىمىزدىڭ كەلەشەگىن جارقىن ەتۋ بولعان سوڭ، ىرگەلى وزگەرىستى باستاعان مەملەكەت باسشىسى قاسىم-جومارت توقايەۆتى ءبارىمىز قولداۋىمىز كەرەك»، - دەدى اقىن.
سونىمەن قاتار اتالمىش قوزعالىس وكىلدەرى قوعامعا ۇندەۋ جاريالادى.
«ءبىز يدەيانىڭ اينالاسىنا توپتاسۋعا شاقىرامىز. ەلىمىزدى ساياسي جانە ەكونوميكالىق تۇرعىدان رەفورمالاۋ - جاڭا قازاقستانعا جەتكىزەتىن جول. ءبىز رەفورمانى جاقتاۋشىلاردىڭ قانشالىقتى كوپ ەكەنىن كورسەتۋ ءۇشىن بىرىگەيىك دەپ وتىرمىز. ال ءبىزدىڭ وتە كوپ ەكەنىمىز انىق. ارينە، وسى ارقىلى كىمنىڭ العا جىلجىعىسى كەلمەيتىنىن دە، كىمنىڭ ىشتەي نە اشىق تۇردە ەسكى قازاقستاندى اڭسايتىنىن دا بىلەمىز. تاڭداۋ جاسار ءسات تۋدى»، - دەدى قوعام وكىلدەرى ۇندەۋدە.
