ۋكرايناداعى قارۋلى قاقتىعىس جاڭا كەزەڭگە اياق باستى

باسقىنشىلارعا قارىمتا شابۋىل ۇيىمداستىرىپ، ەلدى مەكەندەردى ازات ەتىپ جاتىر. وسىنىڭ اسەرىنەن ۋكراينا ۇلكەن قارقىنمەن العا جىلجىپ، وسكيلل وزەنىنە دەيىن جەتىپ، دونباستاعى سوعىس كارتاسىن قايتا سىزىپ شىقتى. وسى شابۋىلداردان كەيىن ساراپشىلار ۋكراينانىڭ جەتى ايعا ۇلاسقان سوعىستىڭ ءمانماتىنىن وزگەرتىپ جىبەرگەنىن ايتادى.

ال ۋكراينا پرەزيدەنتى ۆلاديمير زەلەنسكي CNN تەلەارناسىنا بەرگەن سۇحباتىندا قازىر رەسەي پرەزيدەنتى ۆلاديمير پۋتينمەن كەلىسسوز جۇرگىزۋگە دايىن ەمەسپىن دەدى.

رەسەي پرەزيدەنتى ۆلاديمير پۋتين ۋكراينادا «اسەري وپەراتسيا باستايتىنىن» جاريالاعالى 201 كۇن ءوتتى. ال قىركۇيەكتىڭ باسىنان قارۋلى قاقتىعىس جاڭا كەزەڭگە اياق باستى. ۋكراينا پرەزيدەنتى ۆلاديمير زەلەنسكيي ەلدىڭ قارۋلى كۇشتەرى حاركوۆ جانە حەرسون وبلىسىندا اۋماعىنداعى ءبىرقاتار ەلدى مەكەندى ازات ەتكەنى جايلى مالىمدەدى.

«ۋكراينالىق اسكەريلەر 1-قىركۇيەكتەن بەرى حاركوۆ جانە حەرسون وبلىسىندا اۋماعى مىڭ شارشى شاقىرىمنان اساتىن ونداعان ەلدى مەكەندى ازات ەتتى. بۇعان اتسالىسقانداردىڭ بارىنە، ونىڭ ىشىندە اسكەرگە، بارلاۋ قىزمەتىنە، ارنايى قىزمەت وكىلدەرىنە العىس ايتامىن»، دەيدى ۋكراينا پرەزيدەنتى ۆلاديمير زەلەنسكي.

ال وتكەن سەنبىدە رەسمي كيەۆ بالاكلەيادا ۋكراينا تۋى كوتەرىلىپ، ۇلتتىق ءانۇران شىرقالىپ جاتقان ءساتتى جاريالادى. سونىمەن قاتار ۋكراين جاۋىنگەرلەرى حاركوۆ وبلىسىندا رەسەي اسكەرىنە كۇتپەگەن جەردەن سوققى بەرىپ، ولاردى يزيۋم، كۋپيانسك سەكىلدى ستراتەگيالىق ماڭىزى زور قالالاردان قاشۋعا ءماجبۇر ەتكەن.

«حاركوۆ وبلىسىنداعى اسكەري ءىس-قيمىل ناتيجەسىندە ءبىز 20 ەلدى مەكەندى قارسىلاستىڭ باقىلاۋىنان بوساتتىق. كراماتورسك تۇبىندە ءبىزدىڭ ارميا ءوزىنىڭ تاكتيكالىق جاعدايىن جاقسارتتى. شابۋىل اياسىندا ايماقتىق قورعانىس اسكەرىنىڭ 103-بريگاداسىنىڭ بولىمدەرى مەن ۇلتتىق گۆارديانىڭ 15-باتالونى قارسىلاستىڭ تىلىنا 3 شاقىرىمعا دەيىن ەنىپ، وزەرنوە ەلدى مەكەنىن بوساتتى»، دەيدى ۋكراينا ارمياسى باس شتابىنىڭ باس جەدەل ءبولىمى باسشىسىنىڭ ورىنباسارى الەكسەي گروموۆ.