كاسپي تەڭىزى تارتىلىپ بارادى

نۇر-سۇلتان. قازاقپارات - ەكولوگتار كاسپي تەڭىزى ارال تەڭىزىنىڭ تاعدىرىن قايتالاۋى مۇمكىن دەپ دابىل قاعىپ جاتىر.

رەسمي دەرەك بويىنشا، تەڭىز 2006 -جىلدان بەرى تايازدانىپ، بۇگىنگى تاڭدا ونىڭ اۋماعى 22 مىڭ شارشى شاقىرىمعا قىسقارعان.

اقتاۋ تۇرعىندارىنىڭ ايتۋىنشا، جاعالاۋ سىزىعى كۇرت وزگەرگەن. كەي جەرلەردە تەڭىز 20 مەترگە تارتىلعان.

«تەڭىز جاعاسىمەن ءجيى سەرۋەندەيمىز. كاسپيدىڭ تايازدانىپ بارا جاتقانى كورىنەدى. ۇلكەن ەكولوگيالىق اپات بولا ما دەپ قورقامىز»، - دەيدى جەرگىلىكتى تۇرعىن.

كاسپي تەڭىزىنىڭ تايىزدانۋىن ەكولوگتار ەدىل مەن جايىقتان كەلەتىن سۋدىڭ ازايۋىمەن بايلانىستىرادى. بۇل وزەندەر سۋ قويماسى سىيىمدىلىعىنىڭ 80 پايىزىن قامتاماسىز ەتەدى. ەكولوگ ورىنباسار توعجانوۆ وزەندەردى ءتيىمدى پايدالانۋ ءۇشىن مەملەكەتتەر اراسىنداعى ترانسشەكارالىق ىنتىماقتاستىق شارالارىن جاساۋ قاجەت دەپ ەسەپتەيدى.

«قازاقستان مەن رەسەيدىڭ ەكولوگتارى بىرنەشە رەت وسى جاعدايدى تالقىلادى. ماماندار سوڭعى 50 جىلدا جايىق وزەنىنىڭ ماڭىندا تۇراتىن حالىق سانى التى ەسەگە وسكەنىن ايتادى. سوندىقتان قازاقستان دا، رەسەي دە سۋ رەسۋرستارىن پايدالانۋدى بىرلەسىپ ۇنەمدەۋى كەرەك»، - دەدى توعجانوۆ.