قايتىپ بارا جاتقان ءورت سوندىرۋشىلەردى كورگەندە جىلاپ جىبەرە جازدادىم - اۋليەكول تۇرعىنى

تۇرعىننىڭ ايتۋىنشا، قىزىل جالىنمەن كۇرەسكە جۇمىلدىرىلعان ءورت سوندىرۋشلەر جۇمىسىن اياقتاپ، استاناعا قاراي جولعا شىققان.

«جاڭا مىنا جەردەن 10-عا جۋىق ۇلكەن ءورت ءسوندىرۋ كولىگى ءوتتى. مىناۋ - باعانالى جاقتان استاناعا باراتىن جول. وسى جولمەن سيرەنا قوسقان 10 شاقتى كولىك كەتتى. ولاردىڭ كەتىپ بارا جاتقانىن كورگەندە، قۋانعانىمنان جىلاپ جىبەرە جازدادىم. مىنە، تيموفەيەۆ جاقتاعى بۇرىلىستان تاعى ەكى ءورت ءسوندىرۋ كولىگى كەلە جاتىر. جولدارىڭ بولسىن، امان- ەسەن ۇيلەرىڭە جەتىڭدەر! اللا بارشاڭىزعا باقىتتى عۇمىر ءناسىپ ەتسىن. بۇلار دا جاپ- جاس بىرەۋدىڭ بالاسى، بىرەۋدىڭ اعاسى. بىزگە كومەكتەسكەندەرىڭىز ءۇشىن ريزامىز، ۇزاق عۇمىر تىلەيمىز»، - دەپ جىلى لەبىزىن ءبىلدىردى قوستاناي وبلىسىنىڭ تۇرعىنى.

ەسكە سالايىق، اۋليەكول اۋدانىنداعى ءورتتى سوندىرۋگە تجم، ءىىم، ۇۇ جانە قورعانىس مينيسترلىگىنىڭ 224 تەحنيكاسى، 7 اۋە كەمەسى، 5 ءورت ءسوندىرۋ پويىزى مەن 2193 ادام جۇمىلدىرىلعان بولاتىن.

بۇرىن حابارلاعانىمىزداي، قوستاناي وبلىسىنا باسقا وڭىردەن كەلگەن ءورت سوندىرۋشىلەر بۇگىندە ۇيىنە قايتىپ جاتىر.

قوسا كەتسەك، بىرنەشە كۇن بۇرىن الەۋمەتتىك جەلىلەردە قوستاناي وبلىسىنداعى قىزىل جالىنمەن كۇرەستەن كەيىن ۇرلەمەلى قاپتا ۇيىقتاپ جاتقان ءورت سوندىرۋشىلەردىڭ سۋرەتى جاريالانعان ەدى.

ول جولى جەلى قولدانۋشىلارى بۇل جاريالانىمدى قىزۋ قولداپ، قۇتقارۋشىلارعا ىزگى تىلەكتەرىن جازعان بولاتىن.