الماتىدا بۇرالقى يت پەن مىسىق قالاي اۋلانادى

بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالاسى كاسىپكەرلىك جانە ينۆەستيتسيالار باسقارماسى باسشىسىنىڭ ورىنباسارى ەرلان وماروۆ ايتتى، دەپ حابارلايدى قازاقپارات ءتىلشىسى.

«كۇندەلىكتى «قالالىق ۆەتەريناريالىق قىزمەت» ك م ك-نىڭ 6 كەزەكشى بريگاداسى قاراۋسىز جانە قاڭعىباس جانۋارلاردى اۋلاۋ جۇمىستارىن جۇرگىزەدى. بيىل ناۋرىز ايىنا دەيىن اۋلانعان جانۋارلار يەلەرى تابىلعانعا دەيىن جانە جاڭا يەلەرىنە بەرىلگەنگە دەيىن 3 تاۋلىك بويى قاراۋدا بولعان. ق ر ۆەتەريناريا سالاسىنداعى زاڭناماسىنا سايكەس، كەرەكسىز دەپ تابىلعان جانۋارلار ءدارى-دارمەكپەن ۇيىقتاتىلعان. 2-ناۋرىزدان باستاپ قازاقستان رەسپۋبليكاسىنىڭ «جانۋارلارعا جاۋاپكەرشىلىكپەن قاراۋ تۋرالى» زاڭىنىڭ قابىلدانۋىنا بايلانىستى، قاڭعىباس جانە قاراۋسىز قالعان جانۋارلاردىڭ سانىن رەتتەۋ ءتارتىبى ايتارلىقتاي وزگەردى»، - دەدى ەرلان وماروۆ.

ايتۋىنشا، جاڭا ەرەجەگە سايكەس، اسا قاۋىپتى جۇقپالى اۋرۋلارى جانە اگرەسسيا بەلگىلەرى بار جانۋارلاردى قوسپاعاندا، اۋلانعان جانۋارلاردى جانسىزداندىرۋعا تىيىم سالىنادى.

«اۋلاۋ جانۋارعا جاراقات سالۋدى جانە مەرتىگۋدى بولدىرمايتىن گۋماندى تاسىلدەرمەن جۇزەگە اسىرىلادى. ادام مەن جانۋاردىڭ ومىرىنە نەمەسە دەنساۋلىعىنا ناقتى قاتەر تونگەن جاعدايلاردى قوسپاعاندا، بالالاردىڭ قاتىسۋىمەن جانۋارلاردى اۋلاۋعا جول بەرىلمەيدى. اۋلاۋ جانۋارلارعا زيان كەلتىرمەيتىن قۇرالدارمەن، وقشاۋلانعان تۇزاقتاردى، تورلاردى، گەلدىك وقشاۋلاعىشى بار ىلمەكتەردى قولدانا وتىرىپ جۇزەگە اسىرىلادى»، - دەپ ءتۇسىندىردى سپيكەر.

سونداي-اق، ول ۆەتقىزمەتتىڭ قىزمەتكەرلەرى جاڭا مامانداندىرىلعان فورمامەن جانە ءتيىستى ۇلگىدەگى بەيدجبەن قامتاماسىز ەتىلگەندىگىن ايتتى. اۋلانعان جانۋارلاردى تاسىمالداۋ مامانداندىرىلعان اۆتوكولىكپەن جۇزەگە اسىرىلادى.

«اۋلانعان قاڭعىباس جانە قاراۋسىز قالعان جانۋارلار ۋاقىتشا ۇستاۋ پۋنكتىنە اكەلىنەدى. اۋلانعان جانۋارلاردى قابىلداۋ، جانۋاردى ەسەپكە الۋدى قاتاڭ تۇردە ۆەتەرينارلىق دارىگەر جۇرگىزەدى. ۆەتەرينارلىق دارىگەر جانۋارلاردىڭ جاراقاتتارى بار جوعىن انىقتاۋ ءۇشىن كلينيكالىق تەكسەرۋ جۇرگىزەدى، تاڭبانىڭ، ميكروچيپتىڭ بولۋىن سكانەرلەيدى»، - دەپ تۇيىندەدى سپيكەر.

بۇعان دەيىن ەكولوگيا، گەولوگيا جانە تابيعي رەسۋرستار مينيسترلىگى ءۇي جانۋارلارىن مىندەتتى ەسەپكە الۋ 2023 -جىلدىڭ 1-قىركۇيەگىنەن باستاپ ەنگىزىلەتىنىن مالىمدەگەن بولاتىن.