قوستاناي وبلىسىندا ورتتەن زارداپ شەككەندەرگە باسپانا سالۋعا قانشا ميلليارد تەڭگە ءبولىندى
بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا توتەنشە جاعدايلار مينيسترلىگىنەن ءبىرىنشى بيۋجەتتىك ءوتىنىم كەلدى. وسى بيۋجەتتىك وتىنىمگە سايكەس 2,3 ميلليارد تەڭگە ۇكىمەت رەزەرۆىنەن بولىنەدى. بۇل نىسانالى قاراجات. ول ءۇي قۇرىلىسىنا جۇمسالادى. بۇگىنگى ەسەپتەۋلەرگە سايكەس، بۇل قاراجات 91 ءۇي سالۋعا ءبولىنىپ وتىر. ءار ۇيگە شاققاندا 25 ميلليارد تەڭگەدەن كەلەدى»، - دەدى مينيستر ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا جۋرناليستەردىڭ ساۋالىنا وراي.
ونىڭ اتاپ وتۋىنشە، ءۇي سالىناتىن ءار ۋچاسكە 10 سوتىقتان بولادى. ءۇيدىڭ جالپى اۋماعى 100 شارشى مەتردى قۇرايدى.
«بۇل قاراجاتتىڭ ىشىندە ينفراقۇرىلىم دا بار. سۋمەن، ەلەكتر ەنەرگياسىمەن قامتاماسىز ەتىپ، جول سالىناتىن بولادى»، - دەدى الىبەك قۋانتىروۆ.
