ايدوس سارىم: پرەزيدەنت سايلاۋى - ساياسي رەفورمالاردىڭ ءبىر كورىنىسى
بۇل پىكىردى ساياساتتانۋشى، ق ر پارلامەنتى ءماجىلىس دەپۋتاتى ايدوس سارىم ايتتى، دەپ حابارلايدى قازاقپارات ءتىلشىسى.
ءوز پىكىرىندە ساراپشى پرەزيدەنت سايلاۋىن بيىل وتكىزۋدىڭ سەبەبىن ءتۇسىندىردى.
«بۇل سۇراققا پرەزيدەنتتىڭ ءوزى ناقتى جاۋاپ بەرگەن سياقتى. ەڭ باستى ماسەلە، ساياسي رەفورمالاردى باستاۋ، رەفەرەندۋم كەزىندە قۇرىلعان ساياسي جۇيەنىڭ ناقتى كورىنىسى، كورسەتكىشى - ونىڭ ىسكە اسۋى بولماق. ياعني، ءبىر جاعىنان قوعامنىڭ ءوزى قازىر ءبىر جىل، ەكى جىل كۇتىپ وتىرعىسى جوق. ەكىنشى جاعىنان، كوتەرىلگەن كوپتەگەن ماسەلەلەردى ىسكە اسىرۋ ءۇشىن پرەزيدەنتتىڭ دە، پارلامەنتتىڭ دە ساياسي مانداتى جاڭارۋى كەرەك. بۇل ەلدەگى بۇكىل ساياسي ويىن ەرەجەلەرىن وزگەرتىپ، جاڭا ساياسي تۇلعالاردى، جاڭا پارتيالاردى الاڭعا اكەلىپ، قوعامدىق-ساياسي ءومىردى بەلسەندى ەتىپ، سول ارقىلى ساياسي جاڭارۋدى، جاڭا كوزقاراستاردىڭ ورنىعۋىن، ولاردىڭ ساياسي داستۇرگە اينالۋىن قامتاماسىز ەتۋ كەرەك دەپ ايتتى. سوندىقتان بۇل توسىن سايلاۋ ەمەس، جۇيەلى، وسى وزگەرىستەردى حالىقتىڭ ىقىلاسىن، ساياسي جۇيەنى ىسكە اسىرۋ باعىتىندا جاسالىپ وتىرعان ناقتى قادام دەپ ايتۋعا بولادى»، - دەدى ا. سارىم اگەنتتىك تىلشىسىنە بەرگەن سۇحباتىندا.
ونىڭ پىكىرىنشە، پرەزيدەنتتىككە جەتى جىل مەرزىم اسا كوپ ەمەس، سەبەبى پرەزيدەنت ءبىر رەت قانا سايلانا الادى.
«ەڭ باستىسى ەلىمىز قازىر سۋپەرپرەزيدەنتتىك مودەلدەن كەتىپ جاتىر. جەتى جىلدا پرەزيدەنتتىڭ ءوزىنىڭ ساياسي باعدارلاماسىن ىسكە اسىراتىن، تولىققاندى جۇمىس ىستەي الاتىن مۇمكىندىگى بار. كەم دەگەندە ەكى پارلامەنت سايلاۋىنىڭ باسى-قاسىندا بولادى، ساياسي كۋرسقا، قابىلداناتىن ساياسي زاڭداردىڭ، شەشىمدەردىڭ بارلىعىنا ىقپال ەتە الادى. ياعني، بۇل بولاشاقتاعى ساياسي ۋزۋرپاتسيانى جوياتىن، وعان توقتاۋ قوياتىن ناقتى قادام. مىسالى، بيلىككە كەلگەن ادام «ءبىر-اق رەت پرەزيدەنت بولام، وسى 7 جىلدا بۇكىل ويلاعانىمدى، جۇرتقا بەرگەن ۋادەمدى ورىنداپ شىعۋىم كەرەك» دەگەن ماقساتپەن كەلۋى كەرەك»، - دەدى ساياساتتانۋشى.
سونىمەن بىرگە ا. سارىم ەلىمىزدە تۇتاس سايلاۋ جۇيەسى وزگەرەتىنىن اتاپ ءوتتى. بۇرىن اۋداندىق ءماسليحات، قالالىق ءماسليحاتتار پارتيالىق تىزىممەن سايلاناتىن بولسا، الداعى سايلاۋدا ولاردىڭ بارلىعى جەكەلەگەن ازاماتتاردىڭ سايلاۋعا ءتۇسۋىن قامتاماسىز ەتەدى.
ەسكە سالا كەتسەك، مەملەكەت باسشىسى قاسىم-جومارت توقايەۆ قازاقستان حالقىنا جولداۋىندا پرەزيدەنت مانداتى ۇزاقتىعى 7 جىلدىق ءبىر مەرزىممەن شەكتەۋدى جانە بيىل كۇزدە كەزەكتەن تىس پرەزيدەنت سايلاۋىن وتكىزۋدى ۇسىندى.
