الداعى سايلاۋدا پارلامەنتكە، ۇكىمەتكە جاڭا ادامداردىڭ كەلۋىنە مۇمكىندىك بولادى - سەنات ءتوراعاسى
«مەملەكەت باسشىسى ەلىمىزدە كەزەكتەن تىس پرەزيدەنت سايلاۋىن، ءماجىلىستىڭ سايلاۋىن وتكىزۋ تۋرالى ۇسىنىس ايتتى. بۇل ۇسىنىستى تولىقتاي قولدايمىز. جالپى، وسىنداي قادامعا بارۋدىڭ بىرنەشە ناقتى سەبەبى بولدى. بىرىنشىدەن، ەلىمىزدە ۇلكەن ساياسي رەفورمالاردىڭ جۇزەگە اسىپ جاتقانىن بىلەسىزدەر. وسىنداي رەفورمالاردىڭ اياسىندا ۇلكەن وزگەرىستەر بولىپ جاتىر. 5- ماۋسىم كۇنى رەفەرەندۋمدا كونستيتۋتسيامىزعا وزگەرىستەر ەنگىزدىك. ارى قاراي وسى ساياسي-ەكونوميكالىق رەفورمالار جالعاساتىن بولادى»، - دەدى م. اشىمبايەۆ.
وسى ورايدا ول حالىقتىڭ قولداۋى ارقىلى الاداعى وزگەرىستەردى ىسكە اسىرۋ مۇمكىن بولاتىنىن ايتتى.
«سوندىقتان ەلىمىزدەگى وسى جاعدايدى، قاڭتاردا بولعان تراگەديالىق وقيعالاردى ەسكەرىپ، ءتيىستى وزگەرىستەر بولىپ جاتىر. تۇبەگەيلى رەفورمالاردى جالعاستىرۋ ءۇشىن بيلىك تارماقتارىنا، پرەزيدەنتكە، ۇكىمەتكە، ماجىلىسكە، سەناتقا، ءماسليحاتتارعا حالىقتىڭ مانداتى كەرەك. حالىق قولداسا، وندا سول مانداتتى الىپ، ارا قاراي تۇبەگەيلى رەفورمالاردى جالعاستىرۋعا مۇمكىندىك بولادى»، - دەدى سەنات ءتوراعاسى.
سونىمەن قاتار م. اشىمبايەۆ كەلەسى جىلى وتەتىن سايلاۋدان كەيىن پارلامەنتكە ءتۇرلى سالانىڭ ماماندارى كەلەتىنىن اتاپ ءوتتى.
«ەكىنشىدەن، سوڭعى ايلاردا بيلىككە جاڭا ادامدار كەلۋى كەرەك دەگەن ماسەلە كوتەرىلىپ جاتىر. باسقا سالالاردا قىزمەت ەتىپ جۇرگەندەردىڭ، قوعامدىق جۇمىستاعىلار، بيزنەستەگى مامانداردىڭ، عىلىمداعى ازاماتتاردىڭ كەلۋى تۋرالى ۇسىنىستار ايتىلىپ وتىر. سوندىقتان الداعى سايلاۋلاردى وتكىزۋ ارقىلى ماجىلىسكە، سەناتقا، ءماسليحاتتارعا، ۇكىمەتكە جاڭا ادامداردىڭ كەلۋىنە مۇمكىندىكتەر تۋادى. بۇل سايلاۋلار رەفورمالاردىڭ جالعاسى جانە ونىڭ ناتيجەسىندە جاڭا قوعامدىق ۇيىمدار وكىلدەرىنىڭ، جاڭا ساياسي پارتيالاردىڭ بيلىك تارماقتارىنا كەلۋىنە جول اشىلادى»، - دەدى سەنات ءتوراعاسى.
بۇدان ۇرىن حابارلانعانداي، بيىل قىركۇيەك ايىنداعى جولداۋىندا مەملەكەت باسشىسى كۇزدە كەزەكتەن تىس پرەزيدەنت سايلاۋىن وتكىزۋدى ۇسىندى.
«ەسكى ءتاسىل بويىنشا سايلانعان بيلىكتىڭ وكىلدى ورگاندارىنىڭ كەزەكتەن تىس سايلاۋ ناۋقانى ارقىلى جاڭارۋى زاڭدىلىق. سوندىقتان ءماجىلىستىڭ جانە بارلىق دەڭگەيدەگى ءماسليحاتتاردىڭ سايلاۋىن كەلەسى جىلدىڭ ءبىرىنشى جارتىسىندا وتكىزۋدى ۇسىنامىن»، - دەدى قاسىم-جومارت توقايەۆ.
