بالالارعا تولەم: ۇلتتىق قوردى ەكىگە ءبولۋ ۇسىنىلدى
ءماجىلىس دەپۋتاتى امانجان جامالوۆ باستاما كوتەردى. ول مەملەكەت باسشىسىنىڭ ۇلتتىق قور تابىسىنىڭ 50 پايىزىن جاس قازاقستاندىقتارعا باعىتتاۋ تۋرالى ۇسىنىسى حالىقتىڭ ۇلكەن قولداۋىنا يە بولعانىن اتاپ ءوتتى.
سونىمەن قاتار، ول ۇلتتىق قور قاراجاتىن رەسپۋبليكالىق بيۋجەت تاپشىلىعىن جابۋ ءۇشىن جانە ءتۇرلى مەملەكەتتىك باعدارلامالارعا پايدالانۋ «ينۆەستيتسيالىق كىرىستى ۇلعايتۋ ساياساتىنا قايشى كەلەتىنىن» ايتتى.
«ۇلتتىق قوردان اقشا الا وتىرىپ، ۇكىمەت پرەزيدەنت جولداۋىندا ايتىلعان بالالارعا ارنالعان ينۆەستيتسيالىق تابىستى قىسقارتادى. سوندىقتان ۇلتتىق قوردى ەكى قورعا ءبولۋ ىقتيمال نۇسقا بولۋى مۇمكىن. ءبىرىنشىسى - «رەزەرۆ قورى»، ونى بيۋجەت قاجەتتىلىگىن قارجىلاندىرۋ ءۇشىن پايدالانۋعا بولادى.
ەكىنشىسى - «بالالارعا ۇلتتىق قور». وعان ۇلتتىق قور اكتيۆتەرىنىڭ 50 پايىزى بەرىلەدى جانە ءاربىر بالا ءۇشىن ارنايى شوتتار اشىلادى، ولارعا بارلىق ينۆەستيتسيالىق كىرىس بولىنەدى. بۇگىندە ۇلتتىق قورعا تۇسەتىن بارلىق مۇناي كىرىسى وسى قورلار اراسىندا تەڭ بولىنەدى»، - دەدى ءماجىلىس وتىرىسىندا دەپۋتات جامالوۆ.
سونىمەن قاتار، دەپۋتات كەز كەلگەن ينۆەستيتسيالىق تابىس تۇراقسىز ەكەنىن اتاپ ءوتتى.
«2001-جىلدان باستاپ ۇلتتىق قورىمىزدىڭ ورتاشا كىرىسى جىلدىق 3,7 پايىز بولعان. ءبىراق ۇلتتىق قوردىڭ شىعىنعا ۇشىراعانىنا كەمىندە 5 جىل بولدى، بۇل – 2002، 2008، 2014، 2015، 2018-جىلدار. ۇلتتىق قوردىڭ اكتيۆتەرىن ينۆەستيتسيالىق باسقارۋ ءۇشىن تيىمدىلىك پەن جاۋاپكەرشىلىكتى ارتتىرۋ قاجەت.
ول ءۇشىن ۇكىمەت پەن ۇلتتىق بانك بالالارعا ارنالعان ۇلتتىق قوردىڭ اكتيۆتەرىن ءبولۋ كەزىندە ءارتاراپتاندىرۋ جانە تاۋەكەلدى ازايتۋ تالاپتارىن بەلگىلەيتىن نورماتيۆتىك قۇقىقتىق اكتىلەر ازىرلەۋى قاجەت. بۇل نورماتيۆتىك قۇقىقتىق اكتىلەردە وسى قوردىڭ اكتيۆتەرى ەسەبىنەن ساتىپ الىناتىن قارجى قۇرالدارىنىڭ تىزبەسى، سونداي-اق، ازىرلەنگەن جانە بەكىتىلگەن ينۆەستيتسيالىق دەكلاراتسيا بولۋى ءتيىس»، - دەدى جامالوۆ.
ايتا كەتەيىك، پرەزيدەنت جولداۋىندا بالالار كامەلەت جاسىنا تولعانعا دەيىن ۇلتتىق قوردىڭ جىل سايىنعى ينۆەستيتسيالىق تابىسىنىڭ 50 پايىزىن ارنايى جيناقتاۋشى شوتتارعا اۋدارۋ باستاماسىن ۇسىنعان بولاتىن. جيناقتالعان سوما تۇرعىن ءۇي ساتىپ الۋعا جانە ءبىلىم الۋعا باعىتتالادى.
