15:05, 07 - قىركۇيەك 2022 | GMT +6
ەشقانداي پارتياعا مۇشە ەمەس قاسىم-جومارت توقايەۆ سايلاۋعا قالاي قاتىسا الادى
نۇر-سۇلتان. قازاقپارات - الداعى پرەزيدەنت سايلاۋىنا قازىرگى مەملەكەت باسشىسى قاسىم-جومارت توقايەۆتىڭ كانديداتۋراسىن ءوزى مۇشە ەمەس پارتيالار دا ۇسىنا الادى.
ق ر ادىلەت ءمينيسترى قانات مۋسين ءماجىلىس كۋلۋارىندا وسىلاي دەپ ءمالىم ەتتى، دەپ حابارلايدى قازاقپارات ءتىلشىسى.
«قازىرگى پرەزيدەنت قاسىم-جومارت توقايەۆ الداعى سايلاۋعا ۇمىتكەر رەتىندە قاتىساتىنىن ايتتى. ونىڭ «Amanat» پارتياسىنىڭ قۇرامىندا جوق ەكەنى بەلگىلى. زاڭ بويىنشا ازامات ءوزىن-ءوزى ۇسىنا المايدى. سوندا ول سايلاۋعا قانداي جولمەن تۇسەدى؟» - دەپ سۇرادى ب ا ق وكىلى.
ءمينيستردىڭ ايتۋىنشا، پرەزيدەنت سايلاۋىنا ۇمىتكەردى ساياسي پارتيا ۇسىنۋى ءۇشىن ونىڭ سول پارتيانىڭ مۇشەسى بولۋى مىندەتتى ەمەس.
«قوعامدىق بىرلەستىك بولسىن، ساياسي پارتيا بولسىن، سايلاۋعا ۇيىمعا مۇشە ەمەس ادامدى دا ۇسىنا الادى»، - دەپ جاۋاپ بەردى مينيستر.
