ۇلتتىق ۇلان ساربازى وزىنە قول سالماق بولعان ەر ادامدى قۇتقارىپ قالدى
اقتاۋ. قازاقپارات - اقتاۋ قالاسىنىڭ اتامەكەن اۋىلىندا ۇلتتىق ۇلاننىڭ اسكەري قىزمەتشىسى 4-قاباتتان سەكىرمەك بولعان ەر ازاماتتى قۇتقارىپ قالدى.
بۇل تۋرالى ۇلتتىق ۇلاننىڭ باسپا ءسوز قىزمەتى مالىمدەدى، دەپ حابارلايدى قازاقپارات ءتىلشىسى.
«6-قىركۇيەكتە ساعات 12:15-تە جاۋىنگەرلىك قىزمەتتەن شىعىپ، ۇيىنە كەلە جاتقان ۇلتتىق ۇلاننىڭ اسكەري قىزمەتشىسى ارمان مۇرزامۇراتوۆ ءتورتقاباتتى ۇيدەن سەكىرگەلى تۇرعان ەر ازاماتتى كورەدى. ءسال كىدىرىپ، ازاماتتىڭ ارەكەتىن باقىلاۋ بارىسىندا ونىڭ ناقتى سەكىرۋگە وقتالعانىن اڭعارادى. جەدەل شەشىم قابىلداعان اسكەري قىزمەتشى جوعارعى قاباتقا كوتەرىلىپ، ەر ازاماتتىڭ ارتىنان اقىرىن كەلىپ، قولىنان ۇستاپ الادى. قارسىلاسقانىنا قاراماستان، ونى قاۋىپسىز جەرگە الىپ شىعادى. كەيىن ارمان مۇرزامۇراتوۆ جاعدايدى پوليتسيا قىزمەتكەرلەرىنە حابارلاعان»، - دەلىنگەن ۇلتتىق ۇلاننىڭ باسپا ءسوز قىزمەتى تاراتقان حابارلامادا.
ۆەدومستۆو اقپاراتىنا سايكەس، قازىر پوليتسيا وزىنە قول سالماق بولعان 24 جاستاعى ازاماتتىڭ نەلىكتەن مۇنداي ارەكەتكە بارعانىن انىقتاپ جاتىر.
