كۇزگى اسكەرگە شاقىرۋ ناۋقانى باستالدى

«قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ «اسكەري قىزمەتتىڭ بەلگىلەنگەن مەرزىمىن وتكەرگەن مەرزىمدى اسكەري قىزمەتتەگى اسكەري قىزمەتشىلەردى زاپاسقا شىعارۋ جانە قازاقستان رەسپۋبليكاسىنىڭ ازاماتتارىن 2022 -جىلعى ناۋرىز- ماۋسىمىندا جانە قىركۇيەك- جەلتوقسانىندا مەرزىمدى اسكەري قىزمەتكە كەزەكتى شاقىرۋ تۋرالى» 2022 -جىلعى 4-ناۋرىزداعى جارلىعىنا سايكەس، 1-قىركۇيەكتەن باستاپ ەلىمىزدە كۇزگى اسكەرگە شاقىرۋ كەزەڭى باستالدى»، - دەلىنگەن حابارلامادا

ونداعى مالىمەتتەرگە سايكەس، وبلىستىق، قالالىق جانە اۋداندىق شاقىرۋ كوميسسيالارى جەرگىلىكتى اتقارۋشى ورگاندار اكىمدەرى ورىنباسارلارىنىڭ باسشىلىعىمەن جۇمىسقا كىرىسىپ كەتتى. اسكەرگە شاقىرۋ ناۋقانى 31-جەلتوقسانعا دەيىن جالعاسادى.

الداعى ءتورت اي ىشىندە قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ قاتارى 18-27 جاس ارالىعىنداعى 18 مىڭعا جۋىق جاڭا بۋىنمەن تولىقپاق. ونىڭ ىشىندە 8 مىڭعا جۋىق جاس قارۋلى كۇشتەردىڭ قاتارىنا قوسىلىپ، 6 مىڭنان استام بوزبالا ۇلتتىق ۇلانعا، 3 مىڭنان استام ادام ۇلتتىق قاۋىپسىزدىك كوميتەتىنىڭ شەكارا قىزمەتىنە، 300 دەي جاس توتەنشە جاعدايلار مينيسترلىگىنىڭ بولىمشەلەرىنە جانە 100 گە جۋىق ازامات مەملەكەتتىك كۇزەت قىزمەتىنە شاقىرىلادى.

اسكەرگە شاقىرۋ SMS- حابارلامالار نەمەسە ۇيىنە جانە جۇمىس ورىندارىنا دەربەس شاقىرتۋ قاعازدارىن جىبەرۋ ارقىلى جۇزەگە اسىرىلاتىن بولادى. بۇل شارالاردى جەرگىلىكتى اتقارۋشى ورگاندار ۇيىمداستىرىپ، ونىڭ ىسكە اسۋىن قامتاماسىز ەتەدى. وبلىس، قالا، اۋدان اكىمدەرىنىڭ ورىنباسارلارى اسكەرگە شاقىرۋ كوميسسيالارىن باسقارادى. 7-قىركۇيەكتەن باستاپ جاڭا قۇرامالار جيناۋ پۋنكتتەرىنەن اسكەري بولىمدەرگە جىبەرىلەتىن بولادى.

رەداكتور ايدار وسپانالي