قوستانايداعى ءورت: ۆولونتەرلەر جانۋارلاردى قۇتقارۋدا - فوتو

«نادەجدا پليۋس KST» ق ب ءتوراعاسىنىڭ ورىنباسارى، قوستاناي وبلىسىنىڭ زوولوگيالىق قورعاۋ ۇيىمىنىڭ وكىلى ولگا سولوۆيەۆا قازاقپارات تىلشىسىنە جانۋارلاردى قۇتقارۋ جۇمىستارى تۋرالى ايتىپ بەردى.

قوستاناي وبلىسىندا ورمان ورتتەرى جايىلىپ، ەلدىمەكەندەر جانىپ جاتقاندا قۇتقارۋشىلار ءوز مىندەتتەرىن بۇلجىتپاي ورىنداپ كەلەدى - ولار ءبىرىنشى كەزەكتە ادامداردى قۇتقارادى. ءدال وسى ۋاقىتتا كورىنبەيتىن مايداندا قوستانايلىق زووۆولونتەرلەر ورتتەن زارداپ شەككەن جانۋارلاردى ىزدەپ، قۇتقارۋعا كىرىسىپ كەتتى.

«ءبىز ءورت شىققان جەردە، ەلدى مەكەندەردە جانۋارلارعا كومەك كورسەتۋ پۋنكتتەرىن ۇيىمداستىرامىز. ياعني تاماقتاندىرامىز جانە ەم- دوم جاسايمىز، اۋىر حالدەگى جانۋارلاردى قوستانايعا جەتكىزەمىز. بارلىق قۇتقارىلعان جانۋارلاردى ءۇيسىز جانۋارلاردى ساۋىقتىرۋ ورتالىعىنا ورنالاستىرامىز. ستاتسيونارداعى جانۋارلار «ايبوليت» ۆەتەرينارلىق كلينيكاسىندا ەم الۋدا. يەلەرى بار جانە قۇتقارۋدى قاجەت ەتپەيتىندەرگە وقيعا ورنىندا العاشقى كومەك كورسەتەمىز، جارالاردى جاقپا مايىمەن ەمدەيمىز»، - دەدى ولگا سولوۆيەۆا.

زووۆولونتەرلار امانقاراعاي، وزەرنىي اۋىلدارىندا ورتەنىپ كەتكەن ۇيلەردىڭ ءاربىر بۇرىشىن ارالاپ شىققان.

«ءار ءۇيدى ارالاپ شىقتىق. شىنىمدى ايتسام، جۇمىستىڭ كوپ بولىگى وتكەن تۇندە، ورتتەن كەيىن جانۋارلار ەسىن جيىپ، ادامدارعا شىعا باستاعاندا پايدا بولدى. جانۋارلاردى ىزدەستىرۋگە كريميناليستەر كوپ كومەكتەستى. ولار بىزگە قاي ۇيلەردە جانە قاي جەردە جانۋارلار بار ەكەنىن جانە قانداي كومەك قاجەت ەكەنىن ايتتى»، - دەدى ول.

وكىنىشكە وراي، ەلدى مەكەندەرگە تارالعان ءورت اۋقىمى وراسان زور، ءۇي جانۋارلارى مەن مالدى ايتپاعاندا، بۇكىل ۇيلەر مەن اۋلالار جانىپ كەتكەن.

«شىنىندا دا، كوپتەگەن كۇيگەن مىسىقتار مەن يتتەر تابىلدى، اسىرەسە يتتەر بايلاۋدان بوساي الماعان. بايلاۋدان بوساعان يتتەر دە ءۇي اۋلاسىنان شىعا الماي قالعان. سول جەردە ولار بۇراتىلىپ جان تاپسىرعان»، - دەدى و. سولوۆيەۆا.

ەرىكتىلەر ءۇي جانۋارلارىنا عانا ەمەس، ءىرى قارا مالعا دا كومەكتەسىپ جاتىر.

«ءىرى قارا مالعا كومەكتەسۋ تۋرالى كوپتەگەن وتىنىشتەر كەلىپ تۇسۋدە. بىزدە بارلىق قاجەتتى ءدارى- دارمەكتەر بار. كۇيگەن سيىرلار دا بولدى. مۇنداعى ءبىزدىڭ باستى كومەگىمىز جارالارعا شىبىندار تۇسپەۋى ءۇشىن ارنايى جاقپا مايلارمەن ەمدەۋ بولدى. ءىرى قارا مال دا كوپتەپ قىرىلعان. ءۇي قۇستارىنىڭ كوپشىلىگىنە ءيىس تيگەن. كەشە امانقاراعايدان قوستانايعا جەتى مىسىق پەن ءيتتى جەتكىزدىك. ولاردىڭ كوپشىلىگى اۋىر جاعدايدا، تىنىس جولدارى ءىسىنىپ، دەنەسىن كۇيىك شالعان»، - دەدى ۆولونتەر.

ال بۇگىن اۋليەكول اۋدانىنىڭ ەلدى مەكەندەرىنە مال دارىگەرى مەن مەدبيكە باردى.

«اۋليەكولدە شاتىر قۇرامىز، جاقىن كۇندەرى سوندا جۇمىس ىستەيتىن بولامىز. زارداپ شەككەن جان- جانۋارى بار كەز كەلگەن ادام بىزدەن مەديتسينالىق قىزمەت الا الادى. بۇگىن قوستانايدان تاعى ەكى كولىك كومەككە كەلەدى، ويتكەنى كۇيگەن جانۋارلار وتە كوپ. ءبىز ءبارىن جاسايمىز - جانۋارلاردى مۇمكىندىگىنشە قۇتقارامىز، قىرىلعاندارىن جيناپ شىعامىز. تۇرعىنداردان زارداپ شەككەن جانۋارلار تۋرالى جەدەل جەلىگە حابارلاپ، ناقتى مالىمەتتەر مەن ورنالاسقان جەرىن ايتۋدى سۇرايمىز. ويتكەنى، جانۋارلاردى دا قۇتقارۋ كەرەك، ولاردىڭ اراسىندا ورتتەن كەيىن كۇتىمدى قاجەت ەتەتىندەرى كوپ»، - دەدى و. سولوۆيەۆا.

ايتا كەتەيىك، 5-قىركۇيەك ساعات 20.00-گى جاعداي بويىنشا قوستاناي وبلىسىنداعى 5 ۋچاسكەدە جۇرگىزىلۋدە (امانقاراعاي، لەسنوە، وزەرنوە جانە كالينينو اۋىلدارىندا). بارلىعى 91 تۇرعىن ءۇي زارداپ شەكتى. ونىڭ ىشىندە 85 امانقاراعاي اۋىلىندا جانە 6 وزەرنىي اۋىلىندا.

توتەنشە جاعدايلار جونىندەگى كوميسسيا وتىرىسىنىڭ حاتتاماسىنا جانە قوستاناي وبلىسى اكىمىنىڭ جەرگىلىكتى اۋقىمداعى توتەنشە جاعدايدى جاريالاۋ تۋرالى شەشىمىنە قول قويىلدى.

ءورت ءسوندىرۋ جۇمىستارى جالعاسۋدا.