فۋتزالدان قازاقستان قۇراماسى ازەربايجانمەن جولداستىق كەزدەسۋ وتكىزەدى

نۇر-سۇلتان. قازاقپارات - فۋتزالدان قازاقستان قۇراماسى قىركۇيەك ايىندا ازەربايجانمەن ەكى مارتە جولداستىق كەزدەسۋ وتكىزەدى، دەپ حابارلايدى قازاقپارات ءتىلشىسى.

ويىندار 19-20- قىركۇيەك كۇندەرىنە جوسپارلانعان. ەكى كەزدەسۋ دە اقتاۋ قالاسىنداعى «حالىق ارەنا» سپورت كەشەنىندە وتەدى دەپ جوسپارلانعان.

بۇل فۋتزالدان 2024-جىلعى الەم چەمپيوناتىنا ىرىكتەۋگە دايىندىق ەسەبىندە ۇيىمداستىرىلىپ وتىر.

قازاقستاندىق فۋتزالشىلار اتالعان تۋرنيردىڭ نەگىزگى ساتىسىنداعى ىرىكتەۋ كەزەڭىندە بەسىنشى توپتا سىنعا تۇسەدى. قارسىلاستارى - سلوۆەنيا جانە چەرنوگوريا. ىرىكتەۋ كەزەڭى 2022-جىلدىڭ 8- قازانىندا باستالىپ، 2023-جىلدىڭ 8- ناۋرىزىندا اياقتالادى.

ەسكە سالا كەتەيىك، نەگىزگى ساتىسىنداعى ىرىكتەۋ كەزەڭى 12 توپتان تۇرادى. ءار توپتىڭ جەڭىمپازدارى مەن ەكىنشى ورىن العان ءتورت ۇزدىك كوماندا تىكەلەي ەليتالىق كەزەڭگە شىعادى.

الەم چەمپيوناتى 1989-جىلدان بەرى تۇراقتى وتكىزىلىپ كەلەدى. قازاقستان قۇراماسى اتالعان دودادا ءۇش مارتە باق سىنادى. 2021-جىلى ءتورتىنشى ورىنعا تۇراقتادى.