كەلەسى جىلى جانارماي باعاسى قالاي وزگەرۋى مۇمكىن - مينيستر بولجام جاسادى

نۇر-سۇلتان. قازاقپارات – ق ر ەنەرگەتيكا ءمينيسترى بولات اقشولاقوۆ كەلەسى جىلى جانارماي باعاسى قالاي وزگەرۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

«بۇعان دەيىن دە ايتقانىمىزداي، كەلەسى 180 كۇنگە ارنالعان بىرلەسكەن بۇيرىققا قول قويىلعان. جىلدىڭ سوڭىنا دەيىن باعا وزگەرمەيدى. كەلەسى جىلى قالاي بولاتىنىن كورەمىز. ارىپتەسىم ماعزۇم مارات ۇلى ايتتى عوي، باعانىڭ ايىرماشىلىعى قازىرگى ۋاقىتتا ەداۋىر بولىپ تۇر. ەكى جىل بۇرىن رەسەي مەن قازاقستانداعى باعا ايىرماشىلىعى 60-80 تەڭگە بولاتىن. ال قىرعىز رەسپۋبليكاسىمەن ءتىپتى بىردەي ەدى. كەيىنگى ەكى جىلدا پارقى قالاي وزگەرگەنى وزدەرىڭىزگە ءمالىم - ەكى ەسە ايىرماشىلىق بار. باعانىڭ قالاي بولاتىنى نارىققا بايلانىستى. ءبىراق سونشالىقتى قاتتى وسەدى دەپ جوسپارلاپ وتىرعان جوقپىز»، - دەدى مينيستر.

ونىڭ مالىمەتى بويىنشا، قازىر ىشكى نارىققا جەتكىلىكتى جانار-جاعارماي شىعارىلىپ جاتىر.

ال بۇل - قازاقستاندىقتار ءۇشىن جانارماي باعاسى ايتارلىقتاي وسپەيتىنىن بىلدىرەتىن كورسەتكىش.

«2020-جىلى تامىز ايىندا نارىققا 424 مىڭ توننا ديزەل جەتكىزىلگەن. ەشقانداي تاپشىلىق بولعان جوق. بىلايعى حالىققا دا، ديقاندارعا دا ەركىن جەتكەن. بيىل تامىز ايىندا 517 مىڭ توننا جەتكىزدىك. 2020-جىلعىدان 100 مىڭ توننا ارتىق دەگەن ءسوز. كەي ستانسالاردىڭ ديزەل جوق دەگەنى، ماعزۇم مارات ۇلى ايتقانداي، كولەڭكەلى ەكسپورتقا بايلانىستى. ودان كەيىن بىزدە ترانزيتتىك كولىك كوپ وتەدى. سوندا دا ءوز ونىمدەرىمىز وزىمىزگە جەتكىلىكتى بولىپ تۇر. ياعني، كەلەسى جىلى دا باعا ايتارلىقتاي وسەدى دەگەن بولجام جوق. قابىلداعان شارالاردىڭ ءبارى نارىقتى رەتكە كەلتىرگەن كەزدە انىق بولادى. ەشقانداي باعانى قاتتى كوتەرۋ ماسەلەسى جوسپاردا جوق»، - دەدى ەنەرگەتيكا ءمينيسترى.