ءىلبىستىڭ جويىلىپ كەتۋ قاۋپى بار - مامان

مۇنداي پىكىردى ءىلبىستى باقىلاۋ ورتالىعىنىڭ تەريولوگيا زەرتحاناسىنىڭ مەڭگەرۋشىسى، Wildlife Without Borders مۇشەسى الەكسەي گراچيەۆ ايتتى، دەپ حابارلايدى قازاقپارات ءتىلشىسى.

الەكسەي گراچيەۆتىڭ سوزىنشپە، الماتىنىڭ تاۋلى وڭىرلەرى نەگىزگى لاندشافتىق-ەكولوگيالىق كورسەتكىشتەر بويىنشا ىلبىستەردىڭ تىرشىلىك ەتۋ ورتاسى ءۇشىن جوعارى الەۋەتكە يە.

«الايدا، قار بارىسىنىڭ ەكوجۇيەلەرىنە جاقىن ورنالاسقان قالا-مەگاپوليس، حالىق سانىنىڭ ۇنەمى ءوسۋ قارقىنى جانە ينفراقۇرىلىمنىڭ دامۋى ءىلبىستىڭ ءومىر سۇرۋىنە كەرى اسەر ەتەدى. ءتىپتى، جويىلىپ كەتۋ قاۋپى بار. وعان تاۋلى جەردە كۋرورتتاردىڭ سالىنۋى مەن رەتتەلمەيتىن، ستيحيالىق تۋريستەر اعىنى سەبەپ بولىپ وتىر. الماتى ماڭىنداعى تاۋ ۋچاسكەلەرىن ودان ءارى يگەرۋ جاعدايدى ودان ءارى ۋشىقتىرىپ، تەك جابايى جانۋارلاردىڭ عانا ەمەس، بۇكىل ەكوجۇيەنىڭ تىرشىلىك ەتۋ ورتاسىنا كەرى اسەرىن تيگىزەتىنى انىق»، - دەيدى عالىم.

ايتۋىنشا، زوولوگيا ينستيتۋتىنىڭ عالىمدارى جۇرگىزگەن سوڭعى زەرتتەۋلەرگە سايكەس، الماتى توڭىرەگىندەگى كەيبىر ۋچاسكەلەردە 1200 مەتر بيىكتىكتەن قار بارىستارى تابىلعان.

«بۇل شامامەن كوكتوبە دەڭگەيىندە. نەگىزىنەن، قار بارىستارى قىستا سونشالىقتى تومەن تۇسەدى. بارىستار الماتىنىڭ قازىرگى شەكاراسىندا - بوستاندىق جانە مەدەۋ اۋداندارىندا تۇرادى، ياعني ولار قالا تۇرعىندارى رەتىندە ەسەپتەلەدى. ىلە الاتاۋىندا مەكەندەيتىن 40 بارىستىڭ 23 ءى الماتى قالاسىنان 30 شاقىرىم راديۋستا مەكەندەيدى، ونىڭ ىشىندە 5 دارا ءتۇرى قالادا تۇرادى»، - دەدى الەكسەي گراچيەۆ.