اجىممەن كۇرەسۋدە بوتوكستى نەمەن الماستىرۋعا بولادى؟

ءبىراق 25 جاستا دا، 50 جاستا دا كەزدەسەتىن ءبىر پروبلەما بار: ول - ءاجىم.

ءتىپتى، ۇساق ءاجىمنىڭ ءوزى جاس قوسىپ كورسەتەدى، سوندىقتان كەز كەلگەن ايەل ولاردان ارىلعىسى كەلەدى. بۇل كەزدە كوپشىلىكتىڭ ويىنا بوتوكس كەلەدى. ءبىراق ، ادەتتە، ايەلدەر ول تۋرالى جاعىمسىز پىكىردە. سوندىقتان وعان بالاما پروتسەدۋرالاردى ۇسىنامىز.

نەلىكتەن كوپشىلىك بوتوكستان قورقادى؟

بوتۋلوتوكسين Clostridium botulinum دەپ اتالاتىن باكتەريالاردان وڭدەلەدى جانە كۇشتى ۋ سانالادى. ال بوتوكس - وسى ۋىتتىڭ نەگىزىندە جاسالعان پرەپارات. ءوز كەمشىلىكتەرى بار بولسا دا، بۇل اجىممەن كۇرەسۋدەگى ءتيىمدى ءادىس بولىپ كەلەدى. پرەپارات بۇلشىقەتتەرگە ەنگىزىلەدى، ناتيجەسىندە، وندا جۇيكە جۇيەسىنەن كەلەتىن يمپۋلستەرگە سەزىمتالدىق بۇعاتتالادى. ناتيجەسىندە تەرى تەگىس بولا تۇسەدى جانە ءاجىم كەتەدى.

بوتوكستىڭ كەمشىلىكتەرى:

- پروتسەدۋرادان سوڭ ميميكا شەكتەلەدى. ول تولىقتاي جوعالمايدى، ءبىراق ەموتسيانى بۇرىنعىشا كورسەتە المايسىز؛

- بەت بۇلشىقەتتەرىنىڭ قوزعالعىشتىعى مەن سيممەترياسىنىڭ بۇزىلۋ قاۋپى بار؛

- كەي ادامدار بوتۋلوتوكسيندى كوتەرە المايدى.

ەگەر «سۇلۋلىق ەكپەسى» سىزگە ارنالماعان بولسا، باسقا ءتيمدى ادىستەردى ۇسىنامىز.

بەت ماسساجى. بۇل ەڭ «جۇمساق» ءادىس، ءبىراق ول جۇيەلىلىكتى جانە مامان ساۋاتتىلىعىن قاجەت ەتەدى. ارينە، بەت ماسساجىن ۇيدە دە جاساۋعا بولادى. ءبىراق مامان جۇمىسى تيىمدىرەك بولادى. ماسساجدان سوڭ بەتتىڭ ءىسىنۋى ازايادى جانە قاناينالىم جاقسارادى. ناتيجەسىندە، شارشاڭقىلىق باسىلادى، بەت ءتۇسى ساۋ، ال ءاجىم از بولا تۇسەدى.

پلازموليفتينگ. ادامنىڭ كوكتامىرىنان قان الادى دا، پلازمانى قان تۇيىرشىكتەرىنەن (ەريتروتسيتتەر مەن لەيكوتسيتتەر) بولەدى. ارى قاراي وسى پلازمانى پرەپارات رەتىندە پايدالانادى، سەبەبى ونىڭ ىشىندە ترومبوتسيتتەر قالادى. ال ول تىندەردەگى زات الماسۋدى جاقسارتادى. ترومبوتسيتتەر جاسۋشالاردىڭ جىلدام كوبەيۋىنە ىقپال ەتەتىن زات بولەدى. پلازموليفتينگ تەرى تونۋسى مەن ءتۇسىن جاقسارتۋعا، بەزەۋ مەن اجىمنەن ارىلۋعا كومەكتەسەدى.

SMAS- ليفتينگ (HIFU). بۇل ادىستە بارلىق تەرى قاباتىنا اسەر ەتەتىن ۋلترادىبىس قولدانىلادى. ياعني، ناتيجەسىندە بەتكى قابات قانا ەمەس، تەرەڭ جاتقان قاباتتار دا تارتىلادى. بۇل پروتسەدۋرا تەك ءبىر رەت جاسالادى. تەرى تۇتاستىعى بۇزىلمايدى. پروتسەدۋرا كەزىندە اۋىرسىنۋدى باساتىن قۇرالدار قولدانىلمايدى جانە ودان كەيىن بىردەن ۇيگە بارا بەرۋگە بولادى. ءبىراق ناتيجە بىردەن بىلىنبەيدى. ءبىر ايدان سوڭ وزگەرىستەر بايقايسىز، ال ماكسيمالدى اسەر 6-ايدان كەيىن بايقالادى.

فيللەر. بۇل ءاجىمدى تولىقتىرعىشتار. ولار يمپۋلستەردىڭ بەت بۇلشىقەتتەرىنە ءوتۋىن بۇعاتتامايدى. ولار مەحانيكالىق تۇردە تەرى قىرتىستارىن تولتىرادى، ناتيجەسىندە ول تەگىس بولا تۇسەدى. بۇل ءادىستىڭ اسەرى 1-2 جىلعا جەتەدى، ال ودان كەيىن ءاجىم بۇرىنعى قالپىنا تۇسەدى. ءبىراق پروتسەدۋرانى قايتالاۋعا بولادى.

حيميالىق پيلينگ. بۇل ءادىس تەرەڭ اجىمنەن ارىلۋعا كومەكتەسپەيدى جانە جاسى ۇلعايعان كىسىلەرگە ءتيىمدى ەمەس. ءبىراق 35 جاسقا دەيىن پايدا بولعان ۇساق ءاجىمدى كەتىرۋگە كەلەدى. پيلينگتەر تەرىنىڭ ءمۇيىزدى قاباتىن الىپ تاستاۋعا كومەكتەسەدى. ولاردىڭ قۇرامىندا، ادەتتە، جەمىس قىشقىلدارى بولادى.

ەسكەرتۋ: كەز كەلگەن پروتسەدۋرانى جاساماس بۇرىن مامانمەن اقىلداسىپ، مۇمكىن قوسىمشا اسەرلەردى تالقىلاۋ قاجەت.

ال ەگەر ەرتە قارتايعىڭىز كەلمەسە، مىنا ادەتتەردەن اۋلاق بولىڭىز.

اقپارات دەرەككوزى: https://massaget.kz/kyizdarga/krasota/71311/