مەملەكەت حالىق الدىنداعى الەۋمەتتىك مىندەتتەمەلەرىن تولىق ورىندايدى - ءماجىلىس ءتوراعاسى
«بۇگىن بارلىعىمىز پرەزيدەنتتىڭ كەزەكتى جولداۋىن تىڭدادىق. بۇل جولداۋ اسا ەرەكشە بولدى دەپ ايتار ەدىم. ول بۇرىن باستالعان رەفورمالاردىڭ لوگيكالىق جالعاسى بولىپ وتىر. وتە ماڭىزدى، ەلىمىزدىڭ بولاشاق دامۋىنا، تاعدىرىنا قاتىستى اۋقىمدى ماسەلەلەر كوتەرىلدى. ەڭ باستىسى، مەملەكەت باسشىسى جولداۋدا العاش رەت بولاشاق سايلاۋ ناۋقاندارىنىڭ كەستەسىن جاريالاپ، ەلىمىزدىڭ بۇكىل ساياسي جۇيەسىنىڭ جاڭارىپ- جاڭعىرۋىنا جول اشىپ بەردى. بۇل بيلىكتىڭ اشىقتىعىن جانە مەملەكەت پەن قوعام اراسىنداعى سەنىمنىڭ نىعايۋىن ايقىن كورسەتەدى. سونىمەن بىرگە، پرەزيدەنت ەڭ وزەكتى ماسەلەلەرگە توقتالىپ، ولاردى شەشۋ جولدارىن ۇسىندى»، - دەدى ە. قوشانوۆ ءماجىلىستىڭ جالپى وتىرىسىندا.
وسى ورايدا ول پرەزيدەنت جولداۋدا ايتقان بارلىق ماسەلەلەر قوعام سۇرانىسىنا ساي كەلەتىنىن ايتتى.
«قازىر قازاقستاندىقتاردى تولعاندىراتىن ەڭ باستى ماسەلە - ەكونوميكانىڭ دامۋى، حالىقتىڭ ءال- اۋقاتىن ارتتىرۋ. ەلدى باعا مەن تاريفتەردىڭ ءوسۋى الاڭداتىپ وتىر. پرەزيدەنت جولداۋدا كوپتىڭ كوكەيىندە جۇرگەن وسى سۇراقتارعا ناقتى جاۋاپ بەردى. ول «ازامات - بيزنەس - مەملەكەت» اراسىنداعى قاتىناستى تۇبەگەيلى وزگەرتۋدى ۇسىندى. ونىڭ باستى ماقساتى - بيزنەس اشىپ، كاسىپكەرلىكپەن اينالىسۋ ءۇشىن تەڭ مۇمكىندىكتەر جاساۋ، ەكونوميكالىق ەركىندىكتى قولداۋ، مەملەكەتتىڭ ەكونوميكاعا شەكتەن تىس ارالاسۋىنان باس تارتۋ. سونىمەن بىرگە، سالىق جانە بيۋدجەت جۇيەسىن جاڭعىرتۋعا، بيۋدجەت قاراجاتىنىڭ تيىمدىلىگىن ارتتىرۋعا، مەملەكەتتىك- جەكەمەنشىك ارىپتەستىك پەن مەملەكەتتىك ساتىپ الۋ مەحانيزمدەرىن جەتىلدىرۋگە، وتاندىق بيزنەس ءۇشىن نەسيە رەسۋرستارىنىڭ تاپشىلىعى ماسەلەسىن شەشۋگە ەرەكشە باسىمدىق بەرىلىپ وتىر. قازىرگى الەمدەگى كۇردەلى احۋالعا قاراماستان، مەملەكەت حالىق الدىنداعى الەۋمەتتىك مىندەتتەمەلەرىن تولىق ورىندايدى جانە ارتتىرادى»، - دەدى ءماجىلىس ءتوراعاسى.
ونىڭ ايتۋىنشا، ءماجىلىس دەپۋتاتتارى الدىندا كونستيتۋتسيالىق رەفورمالار اياسىندا دا ءبىرقاتار زاڭدى قابىلداۋ مىندەتى تۇر.
«وسى سەسسيادا دەپۋتاتتار جۇمىس ىستەيتىن زاڭ جوبالارىنىڭ ەرەكشە ماڭىزى بار جانە ونى قوعام دا كۇتىپ وتىر. سوندىقتان، ولاردى قاراۋ كەزىندە حالىقتىڭ، ازاماتتىق قوعام وكىلدەرى مەن ساراپشىلاردىڭ پىكىرى مەيلىنشە ەسكەرىلۋى ءتيىس.
جۇمىس توپتارىنىڭ وتىرىستارى، زاڭ جوبالاردىڭ تانىستىرىلىمى سياقتى بارلىق جيىندارعا جۇرتشىلىقتىڭ كەڭىنەن قاتىسۋىن قامتاماسىز ەتۋ قاجەت»، - دەدى ە. قوشانوۆ.
