تاربيەشىلەردىڭ ايلىعى دا، ولارعا قويىلاتىن تالاپ تا ارتادى - اسحات ايماعامبەتوۆ

پارلامەنت كۋلۋارىندا پرەزيدەنت جولداۋىنىڭ ءبىلىم سالاسىنا قاتىستى تاپسىرمالارى تۋرالى پىكىر بىلدىرگەن ق ر وقۋ- اعارتۋ ءمينيسترى اسحات ايماعامبەتوۆ وسىنداي پايىم ايتتى، دەپ حابارلايدى قازاقپارات ءتىلشىسى.

«ءبىلىم سالاسى مەملەكەت باسشىسىنىڭ ۇنەمى باستى نازارىندا. ونى جاڭا وزدەرىڭىز كوردىڭىزدەر. وتە كوپ باستاما ايتىلىپ، بىزگە ءبىرقاتار تاپسىرما بەرىلدى. وسى تاپسىرمالاردىڭ شەڭبەرىندە جۇمىس ىستەيمىز. 1-2 كۇننەن كەيىن ناقتى قانداي شارالار قابىلداناتىنى جونىندە رەسمي اقپارات بەرەمىز»، - دەيدى ۆەدومستۆو باسشىسى.

سونداي- اق، ول بالاباقشا تاربيەشىلەرىنىڭ ايلىعىن كوتەرە ءتۇسۋ ۋاقىت تالابىنان تۋىنداپ وتىرعان ماسەلە ەكەنىن اتادى.

«مەملەكەت باسشىسى ۇستاز مارتەبەسى، ولاردىڭ جالاقىسى تۋرالى ءاردايىم ايتىپ كەلەدى. جالپى كەلەسى جىلى قاڭتاردان باستاپ مۇعالىمدەردىڭ ايلىعى 25 پايىزعا كوتەرىلەدى دەگەن تاپسىرماسى بار. وعان بۇگىن مەملەكەت باسشىسى تاربيەشىلەردىڭ ەڭبەكاقىسىن كوتەرىپ، جۇكتەمەسىن ازايتۋ قاجەتتىگىن ايتتى. بۇل - كەرەمەت نارسە. ويتكەنى ولاردىڭ دا جالاقىسى كوتەرىلىپ جاتقانىمەن، ۇستازدارعا قاراعاندا از بولعاندىقتان ءالى دە كوتەرە ءتۇسۋدى قاجەت ەتەدى. پەداگوگتەردى اتتەستاتتاۋ جانە اككرەديتتەۋ بويىنشا جۇمىستى باستاپ كەتتىك تە. ەندى مەكتەپكە دەيىنگى ءبىلىم بەرۋ ۇيىمدارىندا دا وسىنداي جۇمىس جۇرگىزۋ تۋرالى تاپسىرما بەرىلگەنىن كوردىڭىزدەر. بۇل شىن مانىندە حالىقارالىق تاجىريبەدە بار»، - دەدى اسحات ايماعامبەتوۆ.

مينيستر جالپى تاربيەشىلەردى اتتەستاتتاۋ، مۇعالىمدەردى اكررەديتتەۋ جانە سەرتيفيكاتتاۋ، «قولايلى مەكتەپ» جوباسى تۋرالى پرەزيدەنت تاپسىرمالارى بويىنشا مىندەتتى تۇردە جۇيەلى جۇمىس جۇرگىزىلەتىنىن ءمالىم ەتتى.

ەسكە سالساق، پرەزيدەنت قازاقستان حالقىنا جولداۋىندا 2025 -جىلى ءۇش اۋىسىمدى جانە اپاتتى جاعدايداعى مەكتەپتەر پروبلەماسى تولىق شەشىلەتىنىن ايتقان ەدى.