تۇركىستاندا كۇدىكتىنىڭ قىلمىسىن كۇشپەن مويىنداتپاق بولعان پوليسەيلەر قاماۋعا الىندى

تۇركىستان. قازاقپارات - تۇركىستان وبلىسىندا كۇدىكتىنىڭ باسىنا قاپ كيگىزىپ، قىلمىستى مويىنداتپاق بولعان پوليسيا قىزمەتكەرلەرى قاماۋعا الىندى.

بۇل تۋرالى وبلىستىق پروكۋراتۋرا رەسمي مالىمەت بەردى، دەپ حابارلايدى قازاقپارات ءتىلشىسى.

وبلىستىق پروكۋراتۋرانىڭ حابارلاۋىنشا، قازىرگى تاڭدا سوتقا دەيىنگى تەرگەپ- تەكسەرۋ بويىنشا ساۋران اۋداندىق پوليسيا ءبولىمىنىڭ ءتورت كريمينالدىق پوليسيا قىزمەتكەرىنە قاتىستى تەرگەۋ جۇرگىزىلۋدە. كۇدىكتى دەپ تانىلعان ءتارتىپ ساقشىلارىنىڭ ەكەۋى جۇمىستان بوساتىلعان.

«قازىر ارنايى پروكۋرورلار باسقارماسىنىڭ وندىرىسىندە ن. ومىربەكوۆتىڭ ارىزى بويىنشا ساۋران اۋداندىق پوليسيا ءبولىمىنىڭ قىزمەتكەرلەرىنە قاتىستى قىلمىستىق كودەكستىڭ 146-بابى 2-بولىگى 1,2-تارماقشالارى بويىنشا سوتقا دەيىنگى تەرگەپ- تەكسەرۋ جۇرگىزىلۋدە. تۇركىستان قالاسىنىڭ مامانداندىرىلعان تەرگەۋ سوتىنىڭ قاۋلىلارىمەن جوعارىدا كورسەتىلگەن 4 كۇدىكتىگە قاتىستى ەكى ايعا دەيىنگى مەرزىمگە «كۇزەتپەن ۇستاۋ» تۇرىندەگى بۇلتارتپاۋ شاراسىن قولدانۋعا سانكسيا بەرىلدى. تۇركىستان وبلىسىنىڭ پروكۋراتۋراسىنا ن. ومىربەكوۆتەن سىبايلاس جەمقورلىققا قارسى قىزمەتىنىڭ تۇركىستان وبلىسى بويىنشا دەپارتامەنتىنىڭ تەرگەۋشىسى تاراپىنان مورالدىق قىسىم كورسەتىلگەنى تۋرالى جازباشا شاعىمى تۇسپەگەن»، - دەلىنگەن وبلىستىق پروكۋراتۋرانىڭ رەسمي حابارلاماسىندا.

ەسكە سالايىق، بۇعان دەيىن الەۋمەتتىك جەلىدە پوليسيا باسقارماسىندا ازاپتالعان ەر ادامنىڭ داۋىسى جازىلعان ۆيدەو جاريالانعان ەدى. تەكسەرۋ كەزىندە بۇل بەينەجازبانىڭ ساۋران اۋداندىق پوليسيا بولىمىندە تۇسىرىلگەنى انىقتالعان. ياعني قوي ۇرلاعانى ءۇشىن كۇدىكتى رەتىندە ۇستالعان ازامات وزىنە پوليسەيلەر كۇش كورسەتكەنىن ايتقان. ءتىپتى، باسىنا قاپ كيگىزىپ، ۇرىپ- سوققانىن جەتكىزگەن ەدى.