پاۆلودار تۇرعىنى جانىپ جاتقان كولىكتەن ءتورت ادامدى قۇتقاردى

مارالدى اۋىلىنىڭ 42 جاستاعى تۇرعىنى ەركەبۇلان جۇزبايەۆ جارىلىس قاۋپىنە قاراماستان، ورتەنىپ جاتقان كولىككە قاراي ۇمتىلىپ، ەكى جابىرلەنۋشىنى شىعارعان، ال كۋاگەرلەردىڭ ءبىرى وعان تاعى ەكەۋىن قۇتقارۋعا كومەكتەسكەن.

قازىر زارداپ شەككەندەر اۋرۋحانادا جاتىر. ءتورت ادامنىڭ بىرەۋى كومادا، ەكەۋى اۋىر حالدە. وقيعا 26-تامىزدا پاۆلودار - شارباقتى تاسجولىنداعى مارالدى اۋىلىنىڭ ماڭىندا بولعان. كۋاگەرلەردىڭ ايتۋىنشا، كولىك كاماز تىركەمەسىمەن سوقتىعىسىپ، بىردەن وتقا ورانعان.

جەلىدە تاراعان كادرلاردا وتقا ورانعان كولىك، ودان بىرنەشە مەتر جەردە شوپتە جاتقان ادامدار، زارداپ شەككەندەرگە كومەكتەسىپ جاتقان جەدەل جاردەم قىزمەتكەرلەرى كورىنەدى.

كۋاگەرلەر ۆيدەو ەركەبۇلان ورتەنىپ جاتقان كولىكتەن ادامداردى الىپ شىققاننان كەيىن تۇسىرىلگەنىن ايتادى. قۇتقارۋ ءساتى ۆيدەوعا تۇسپەي قالىپتى.

ءتىلشى كەيىپكەرمەن تىلدەستى. ەر ادام مارالدى ستان سياسىندا تەمىرجولشى بولىپ جۇمىس ىستەيدى ەكەن.

«سول كۇنى كەشكە جۇمىستان قايتىپ كەلە جاتىپ تاسجولداعى جول اپاتىن كوردىم. جولدىڭ شەتىندە كاماز تۇردى، ءسال ارى قاراي Audi ورتەنىپ جاتتى. مەن بىردەن جانىپ جاتقان كولىككە جۇگىردىم. ىشىندە ادامدار بولدى. جاقىن ماڭدا ءبىراز ادامدار تۇردى، ءبىراق ولار كولىك جارىلىپ كەتە مە دەپ قورقىپ جاقىندامادى. مەن دە قاتتى قورقىپ تۇرسام دا، قۇتقارۋ كەرەك دەپ ايقايلادىم. كولىك كەز كەلگەن ۋاقىتتا جارىلىپ كەتۋى مۇمكىن ەكەنىن ءبىلدىم.

ەسىكتى تارتىپ اشىپ بىرەۋىن شىعارىپ، سۇيرەپ شوپكە الىپ باردىم. وسىلاي ەكىنشىسىنە جۇگىردىم، بۇل كەزدە جالىن ودان دا ۇلعايا ءتۇستى. جۇرگىزۋشىلەرگە جۇگىرىپ بارىپ، ءورت سوندىرگىش سۇرادىم. ءبىراق ەشكىمدە ءورت سوندىرگىش بولمادى. بىرەۋ ماعان كىشكەنتايىن بەردى، مەن جانىپ جاتقان كولىككە قايتا جۇگىردىم، ءورت ودان سايىن كۇشەيدى، ءورت سوندىرگىش كومەكتەسپەدى، مەن ەكىنشى جولاۋشىنى شىعارا باستادىم. سوسىن تاعى ءبىر ادام ەكى ادامدى الىپ شىعۋعا كومەكتەستى. سوڭعى جولاۋشىنى قۇتقارعاننان كەيىن، ءبىر مينۋتتاي ۋاقىت ءوتتى، جارىلىس بولدى»، - دەيدى جۇزبايەۆ.