استاناداعى كىشى تالدىكول اۋماعىندا كوشەتتەر ەگىلدى

وعان قالا تۇرعىندارى، ەرىكتىلەر، ەكوبەلسەندىلەر قاتىستى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

ءىس-شارانى ەلوردانىڭ قورشاعان ورتانى قورعاۋ جانە تابيعاتتى پايدالانۋ باسقارماسى ۇيىمداستىردى. ماقساتى - كىشى تالدىكول اۋماعىن اباتتاندىرۋ، قالانى كوگالداندىرۋ جانە ەكولوگيالىق مادەنيەتتى قالىپتاستىرۋ.

300 دەن استام جاپىراقتى اعاش (تال، شەگىرشىن) وتىرعىزىلدى. الداعى ۋاقىتتا تاعى 300 كوشەت ەگۋ جوسپارلانعان.

«كىشى تالدىكولدىڭ اۋماعىن كوگالداندىرۋ جۇمىستارىن جۇرگىزىپ جاتىرمىز. ءبىرىنشى كەزەڭدە 600 دانادان استام جاسىل جەلەك وتىرعىزۋ جوسپارلانعان. بۇگىنگى تاڭدا اكسيا اياسىندا 300 دەن استام اعاش وتىرعىزىلدى، قالعان ۋچاسكەلەردىڭ دايىن بولۋىنا قاراي اياقتاۋ جوسپارلانۋدا»، - دەپ اتاپ ءوتتى نۇر-سۇلتان قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسى تابيعاتتى پايدالانۋدى جانە قۇقىقتى رەتتەۋ سالاسىنداعى مەملەكەتتىك قىزمەتتەر ءبولىمىنىڭ باس مامانى ءۋاليحان قۋانىشيەۆ.

ءمالىم ەتىلگەندەي، ەگىلگەن كوشەتتەر ىلعالعا ءتوزىمدى.

اعاش وتىرعىزۋعا 100 دەن استام ادام قاتىستى، ولار قالا تۇرعىندارى، نۇر-سۇلتان قالاسىنىڭ جاستار ساياساتى ماسەلەلەرى باسقارماسىنىڭ «استانا جاستارى» جاستار رەسۋرستىق ورتالىعىنىڭ ۆولونتەرلەرى جانە ەكوبەلسەندىلەر.

قىركۇيەك-قازان ايلارىندا ەلوردادا جىل سايىنعى «Birge - taza Qazaqstan» كۇزگى ەكولوگيالىق ايلىعى وتكىزىلەتىن بولادى.

قازىرگى ۋاقىتتا كىشى تالدىكولدە ەكوپارك سالۋ جوسپارلانىپ وتىر. جوبادا سۋ ءتۇبىن تەرەڭدەتۋ، سۋ ءتۇبىن لاي جانە باسقا دا زياندى شوگىندىلەردەن تازارتۋ، ورتاشا تەرەڭدىكتى ۇلعايتۋ، سۋ بالانسىن ساقتاۋ جۇمىستارى كوزدەلگەن.