تۇركىستان وبلىسىندا ەجەلگى عيباداتحانا تابىلدى
«كونە نىسان ەكى مىڭ جىل بۇرىن ءومىر سۇرگەن كانگيۋي تايپاسىنا تيەسىلى بولۋى مۇمكىن. ويتكەنى ارحەولوگتار ءدال وسى تايپانىڭ تاريحى تولىق زەرتتەلمەگەنىن ايتادى. ياعني بۇل وڭىردە ءالى تالاي اشىلماعان سىر جاتىر. ارحەولوگتار سوڭعى جىلدارى سوزاق اۋدانىنا قاراستى قىزىلكول ماڭىندا قۇندى ولجاعا كەنەلۋدە. تاسىن تۇرتسەڭ تاريح تەبەرىگى شىعاتىن ايماقتا بۇل جولى كونە زامانعا تيەسىلى عيباداتحانا تابىلدى. ارحەولوگيالىق جادىگەر زەرتتەۋشىلەردى قاتتى قىزىقتىرىپ وتىر»، - دەپ حابارلايدى تەلەارنا.
«بىرىنشىدەن، بۇل قازاقستان اۋماعىندا تابىلعان العاشقى نىسان. كۇن سيمۆوليكاسى مەن ساۋلەت ونەرى كانگيۋي تايپاسىنا تيەسىلى عيباداتحانا ەكەنىن كورسەتىپ وتىر. دىنگە قىزمەت ەتۋشىلەر وسىندا ادەيى جولدانعان بولۋى مۇمكىن. عيباداتحانا اۋماعى ءالى دە زەرتتەۋ جۇمىستارىن تالاپ ەتەدى. ازىرگە تەك جەر بەدەرىنىڭ ۇستىڭگى قاباتى عانا اشىلدى. بەلگىلى بولعانداي ساۋلەت ونەرىنە پايدالانىلعان قۇرىلىس بولشەكتەرى وڭتۇستىك ولكەگە تيەسىلى ەمەس. بەرىكتىكتى قامتاماسىز ەتكەن تاستار ارنايى جەتكىزىلۋى مۇمكىن»، - دەيدى وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتىنىڭ پروفەسسورى الەكساندر پودۋشكين.
ارحەولوگيالىق قازبانىڭ ناتيجەسىندە تابىلعان عيباداتحانا اۋماعىندا مىڭداعان كەراميكالىق بولشەكتەردى كورۋگە بولادى. ماماندار قۇمىرا سىنىقتارىنا ءۇڭىلىپ ونىڭ سۋ مەن ءداندى داقىلداردى ساقتاۋعا ارنالعانىن انىقتادى. تاريحى تەرەڭ قۇندى ولجالاردى ىزدەۋ جۇمىستارى ءالى دە جالعاساتىن بولادى. ارحەولوگيالىق اۋماقتا التىن مەن كۇمىس مەتالدى بالقىتۋعا ارنالعان تيگەل دە تابىلدى. ماماندار جابدىقتى ءدىن وكىلدەرى قولدانعان بولۋى مۇمكىن دەپ توپشالاپ وتىر.
ال عيباداتحاناعا جاقىن جەردە سول زاماندا جەرلەنگەن ەكى ادامنىڭ قورىمى بار. وندا تاس پەن شىنىدان، سۇيەكتەن جاسالعان تاريحي ماڭىزعا يە جۇزدەگەن جادىگەر تابىلدى.
«ەڭ ءبىرىنشى تابىلعان جادىگەر قوڭىراۋ بولدى. ونىڭ ماڭىندا ايەلدىڭ قاسىن بوياۋعا ارنالعان زات تابىلدى. كەيىن مونشاقتار مەن بۇيىمداردىڭ شوعارىن كەزدەستىردىك. ادامنىڭ باس سۇيەگى مەن جاق سۇيەگى دە تابىلدى. ءبىز ونى قايتا جيناقتاۋعا تىرىستىق. ەندى عيباداتحانا اۋماعىنان تابىلعان جادىگەرلەرگە ورتالىقتا ارنايى زەرتتەۋ جۇرگىزىلەدى. ماماندار كەلەسى جىلى قىزىلكول ماڭىندا قازبا ءىسى قايتا جالعاساتىنىن ايتادى»، - دەيدى و ق م پ ۋ ستۋدەنتى ەكاتەرينا كەسمان.
