استانا اكىمدىگىندە ەر ادامعا زومبىلىق جاساعان ايەلدەرگە ۇكىم شىقتى

نۇر-سۇلتان قالالىق سوتىنىڭ رەسمي سايتىندا جاريالانعان اقپاراتقا سايكەس، 2022-جىلعى 27- شىلدەدە ساعات 10:00 شاماسىندا ش. و. جانە م. اكىمدىك عيماراتىندا قوعامدىق ءتارتىپتى دورەكىلىكپەن بۇزىپ، اكىمدىككە كەڭەسكە كەلگەن جابىرلەنۋشى - بەيتانىس م. ەسىمدى ازاماتقا زومبىلىق جاساعان.

ساراپتاماعا سايكەس، ولار م. -نىڭ باسىن جاراقاتتاپ، ەكى قولىن كوگەرتكەن. تەرگەۋ دەنە جاراقاتتارىن دەنساۋلىققا جەڭىل زيان كەلتىرۋ رەتىندە باعالاعان. سونىمەن قاتار ايىپتالۋشى ايەلدەر جولدى بوگەپ، ازاماتتار مەن مەملەكەتتىك ورگان قىزمەتكەرلەرىنىڭ عيماراتقا كىرۋىنە كەدەرگى كەلتىرگەن.

كۇدىكتىلەردىڭ ءىس-ارەكەتى بەينەباقىلاۋ كامەرالارىنداعى جازبالارمەن، سوت-مەديتسينا ساراپتاماسىنىڭ قورىتىندىسىمەن، جابىرلەنۋشىلەر مەن كۋالەردىڭ ايعاقتارىمەن راستالعان.

«ءىس بويىنشا سوتتالعان ادامداردىڭ جاۋاپتىلىعى مەن جازاسىن اۋىرلاتاتىن ءمان-جايلار انىقتالعان جوق. سوتتالعان ادامداردىڭ جاس بالالارىنىڭ بولۋىن سوت جاۋاپتىلىقتى جانە جازانى جەڭىلدەتەتىن ءمان-جايلار دەپ تانىدى.

ش. و. جانە م. بۇرىن سوتتالماعان. بۇزاقىلىق ورتاشا اۋىرلىقتاعى قىلمىس قاتارىنا جاتادى»، - دەلىنگەن سوت حابارلاماسىندا.

جوعارىدا كورسەتىلگەن ءمان-جايلاردى ەسكەرە وتىرىپ، اتالعان ءۇش ايەلگە قىلمىستىق كودەكستىڭ 293-بابى 2-بولىگىنىڭ 1-تارماعى بويىنشا 2 جىل 6 ايعا باس بوستاندىعىن شەكتەۋ جازاسى تاعايىندالدى. پروباتسيالىق باقىلاۋ بەلگىلەندى. سونداي-اق ولار قوعامدىق-ساياسي قىزمەتپەن، ونىڭ ىشىندە ب ا ق پەن تەلەكوممۋنيكاتسيا جەلىلەرىن پايدالانا وتىرىپ 3 جىل مەرزىمگە قوعامدىق-ساياسي قىزمەتپەن اينالىسۋ قۇقىعىنان ايىرىلدى.

سوت ۇكىمى زاڭدى كۇشىنە ەنگەن جوق.