كولسايدان ىستىقكولگە باراتىن جول قايتادان اشىلدى

نۇر-سۇلتان. قازاقپارات - كولسايدان ىستىقكولگە باراتىن جول جاندانادى. ساياحات جاساۋشىلار كورشى ەلگە الماتىدان جانە كولساي كولدەرىنەن تىكەلەي ىستىققولگە ەكى كۇندە جاياۋ جەتەدى.

ايتا كەتەيىك، بۇل سوقپاق 2009 -جىلدان بەرى جابىق بولعان ەدى. مىنە ەندى اراعا 13 جىل سالىپ قايتا اشىلىپ وتىر. الماتىدان شىققان جولاۋشىلار ىستىققولگە ەكى باعىت ارقىلى بارادى. ءبىرىنشى توپ الماتى ماڭىنداعى تاۋدى بەتكە السا، ەكىنشى توپ كولساي ارقىلى جەتەدى. 25 شاقىرىمدىق جول الاتاۋدىڭ شىڭ- قۇزدارى ارقىلى وتەدى.

ساپارعا اتتانعاندار قۇرامىندا 18 ادام بار. ونىڭ تەڭ جارتىسى قىرعىزستان ازاماتتارى. ساياحات بارىسىندا ماماندار مارشرۋتپەن تانىسىپ، جولدى زەرتتەيدى.

ەرجان قالماتايەۆ، ىلە الاتۋى مەملەكەتتىك ۇلتتىق تابيعي پاركىنىڭ باس ديرەكتورى:

- ازىرشە مىناۋ تەستىك رەجيمدە وسى ۇلتتىق پارك كەڭسەسىندە تەكسەرۋ، تىركەۋ وسىندا. بولاشاقتا شەكارانىڭ وزىندە بولادى دەپ ويلايمىن. ادام باسىنا 806 تەڭگە وتەماقىسى. ال پالاتكا قۇرىپ، قونعانىنا سول 1000 تەڭگەگە جۋىق تولەم تولەيدى ءار قونعانعا، ءار كۇنگە. ال تۋريستەر ءۇشىن بۇل جولدى كەلەسى جىلدىڭ ماۋسىم ايىندا اشۋ جوسپارلانىپ وتىر.

2009-جىلعا دەيىن قىرعىز بەن قازاق اراسىنداعى مەملەكەتتىك شەكارانى تەك رەسمي بەكەتتەر ارقىلۋ ءوتۋ مۇمكىن بولاتىن. ءبىراق، ولار تۋريستىك مارشرۋتتاردان تىم الىس ورنالاسقان. الايدا، بۇل ماسەلە بيىل كوكتەمدە ەكى ەلدىڭ مەملەكەت باسشىلارىنىڭ كەزدەسۋىنەن كەيىن شەشىمىمىن تاپتى. كەزدەسۋ ناتيجەسىندە ەكى ەل اراسىنداعى ءتۋريزمدى دامىتۋ ءۇشىن وسى جوبانى قولعا الۋ ايتىلعان ەدى.

ەلەنا كالاشنيكوۆا، قىرعىز رەسپۋبليكاسى ءتۋريزمدى دامىتۋ قورىنىڭ پرەزيدەنتى:

- بۇل 30 جىل ىشىندە قازاقستان مەن قىرعىزستان اراسىندا ىسكە اسىپ وتىرعان ەڭ ۇتىمدى تۋريستىك جوبا دەر ەدىم. سول ارقىلى قارىم- قاتىناس نىعايىپ، ەكونوميكالىق بايلانىستا ورناپ، ەلىمىزگە كەلەتىن شەتەلدىك تۋريستەرگە جول اشىلادى.

داستان رىسبەكوۆ، ق ر سپورت جانە مادەنيەت مينيسترلىگى تۋريزم يندۋسترياسى كوميتەتىنىڭ ءتوراعاسى:

- قازىرگى كەزدە كوپتەگەن شەتەلدىك تۋريستەر قىرعىزستانعا باراردا تىكەلەي ءبىزدىڭ جەردەگى شەكارا ارقىلى بارادى. ماشينامەن نەمەسە اۋە كولىگىمەن. ءبىراق تا ول تۋريستەر ءبىزدىڭ قازاقستاندا كوپ قالمايدى. ەندى ءبىزدىڭ نەگىزگى ماقساتىمىز - وسى ءبىزدىڭ كولساي كولدەرى ۇلتتىق پاركىن تابيعي رەسۋرستارىنا قاراپ، وسى ءبىزدىڭ جەردە 1-2 كۇن قالىپ، سودان كەيىن قىرعىز رەسپۋبليكاسىنا ترانسشەكارالىق مارشرۋت ارقىلى سول جەرگە ءوتۋىن ءبىز بولجامدايمىز.

الماتى مەن كولسايدان ىستىقكولگە بارار جول رەسمي تۇردە كەلەسى جىلى اشىلۋى مۇمكىن. تاۋدىڭ اراسىنداعى جولمەن ساپار جاساۋ ماۋسىمدا باستالىپ قىركۇيەك ايىنا دەيىن جالعاسادى دەگەن جوسپار بار.

الامس سادۋاقاس، راديك جاقىپوۆ

www.24.kz