قۇتلىق ەلتەرىس قاعاننىڭ كەشەنى مەن جازۋى الەمدىك عىلىمعا قوسىلعان تىڭ جاڭالىق - قارين
بۇل تۋرالى قازاقستان رەسپۋبليكاسىنىڭ مەملەكەتتىك كەڭەسشىسى قارين ەرلان فەيسبۋكتەگى پاراقشاسىندا جازدى.
«قازاق عالىمدارى دارحان قىدىرالى، ءناپىل بازىلحان، نۇربولات بوگەنبايەۆ موڭعوليالىق ارىپتەستەرىمەن بىرلەسىپ قۇتلىق ەلتەرىس قاعاننىڭ كەشەنى مەن جازۋىن تاپتى. «نومگون» بىرلەسكەن ەكسپەديتسياسىن حالىقارالىق تۇركى اكادەمياسى مەن موڭعوليا عىلىم اكادەمياسىنىڭ ارحەولوگيا ينستيتۋتى بىرلەسىپ جۇرگىزگەن بولاتىن.
ماماندار نومگون كەشەنىن كۇلتەگىن مەن بىلگە قاعاننىڭ اكەسى، تۇرىك قاعاندىعىن قايتا جاڭعىرتۋشى قۇتلىق ەلتەرىس قاعانعا ارنالعان دەگەن تۇجىرىم جاساپ وتىر. سونىمەن قاتار تابىلعان بىتىكتاس «تۇرك» اتاۋى العاش رەت كەزدەسەتىن ەڭ كونە تۇركى ءداۋىرىنىڭ جازبا ەسكەرتكىشى ەكەنىن ءمالىم ەتتى» دەپ جازدى ەرلان قارين.
مەملەكەتتىك كەڭەسشى قۇتلىق ەلتەرىس قاعاننىڭ كەشەنى مەن جازۋى تابىلۋى الەمدىك عىلىمعا قوسىلعان تىڭ جاڭالىق ەكەنىن اتاپ ءوتتى.
«بۇل تۇركولوگيا عىلىمىنا عانا ەمەس، الەمدىك عىلىمعا قوسىلعان تىڭ جاڭالىق، زور ۇلەس. بۇگىن دارحان قىدىرالىمەن حابارلاسىپ، قازاق عالىمدارىنىڭ تاريحي تابىسىمەن قۇتتىقتاپ، قۋانىشقا ورتاقتاستىق. ول جۋىق ارادا باسپا ءسوز ءماسليحاتىن وتكىزىپ، بىتىكتاستاعى جازۋلاردىڭ سىرىن اشىپ، جالپى جۇرتقا جاريالايتىندارىن ايتتى. وسىلايشا، وتاندىق عالىمدار كونە زاماننىڭ كومبەسىن تاۋىپ، ونى الەمدىك اينالىمعا ەنگىزبەك» دەپ ءتۇيدى ءسوزىن ول.
