ەلوردادا كولىكتەرگە اۆتوبۋس جولاعىمەن جۇرۋگە رۇقسات بەرىلۋى مۇمكىن

نۇر-سۇلتان. قازاقپارات - استانادا كەپتەلىس كوپ بولاتىن كەزەڭدەردەن تىس ۋاقىتتا كولىكتەرگە اۆتوبۋس جولاعىمەن جۇرۋگە رۇقسات بەرىلۋى مۇمكىن.

بۇل تۋرالى «City Transportation Systems» كومپانياسى ءوزىنىڭ instagram داعى رەسمي پاراقشاسىندا جازدى، دەپ حابارلايدى قازاقپارات ءتىلشىسى.

«ەلوردادا Bus Lane بويىنشا جول قوزعالىسىنىڭ بارلىق قاتىسۋشىلارىنا قاربالاس ساعاتتاردان تىس ۋاقىتتا جۇرۋگە رۇقسات بەرۋ ماسەلەسى قاراستىرىلۋدا. ءبىراق مۇنىمەن بىرگە اۆتوبۋستاردى كۇتۋ ۋاقىتى ەداۋىر ارتاتىنىن ەسكەرۋ قاجەت. بۇگىن ەلوردانىڭ 27 كوشە ۋچاسكەسىندە جالپى ۇزىندىعى 72,4 شاقىرىم بولاتىن Bus Lane ىسكە قوسىلعان. Bus Lane ارقىلى قوعامدىق كولىك قوزعالىسىنىڭ تيىمدىلىگى 25 پايىزعا ارتتى جانە جول ءجۇرۋ ۋاقىتى 10 مينۋتقا قىسقاردى»، - دەپ مالىمدەدى CTS ءوزىنىڭ الەۋمەتتىك جەلىدەگى پاراقشاسىندا.

ايتا كەتسەك، بۇعان دەيىن ەلورداعا تاعى 100 ەلەكترواۆتوبۋس جەتكىزىلەتىنىن حابارلاپ ەدىك.