شەتەلدە تاعىلىمدامادان وتكەن ب ا ق وكىلدەرى ەلىمىزگە ورالۋى كەرەك

نۇر-سۇلتان. قازاقپارات - حالىقارالىق باعدارلامالار ورتالىعى تاعىلىمداماعا جىبەرىلەتىن ادامداردان اعىلشىن ءتىلى سەرتيفيكاتىن تالاپ ەتپەيدى.

بۇل تۋرالى «حالىقارالىق باعدارلامالار ورتالىعى» ا ق كونكۋرستىق راسىمدەردى ۇيىمداستىرۋ باسقارماسىنىڭ باس مەنەدجەرى گۇلزات اسانبايەۆا ايتتى، دەپ حابارلايدى قازاقپارات ءتىلشىسى.

«تاعىلىمداما باعدارلاماسى بويىنشا وقۋ اياقتالعاننان كەيىن، قازاقستانعا ورالىپ، ەل وڭىرلەرىندە ءۇش جىل قىزمەتىن اتقارادى. اتاپ ايتقاندا، باستاپقىدا قۇجات تاپسىرعاندا ۇمىتكەر جۇمىس بەرۋشىدەن ءوتىنىم الادى. شەتەلدەگى تاعىلىمدامادان كەلگەن سوڭ، جۇمىس ورنىڭىز ساقتالىپ تۇرادى. وسى ورايدا سول جەردە ءۇش جىل قىزمەتىڭىزدى اتقارۋىڭىز كەرەك»، - دەدى گ. اسانبايەۆا.

ونىڭ ايتۋىنشا، تاعىلىمدامادان ءوتۋ ءۇشىن حالىقارالىق ستيپەنديانى تاعايىنداۋعا كونكۋرستىق ىرىكتەۋگە قۇجاتتار قابىلداۋ بيىلعى 5- قىركۇيەكتە باستالىپ، 14- قازانعا دەيىن جالعاسادى. وتىنىمدەر Egov.kz مەملەكەتتىك قىزمەتتەر پورتالىندا قابىلدانادى. قۇجاتتى مەنەدجەرلەر ەگجەي-تەگجەيلى قاراپ شىعىپ، جاۋاپتى ەكى كۇننىڭ ىشىندە بەرەدى.

«تاعىلىمدامادان وتەتىن ادام كەپىلگە مۇلىك ۇسىنبايدى. گارانت رەتىندە سوڭعى 12 ايدا تۇراقتى تابىسى بار 50 جاسقا دەيىنگى قازاقستاننىڭ ەكى ازاماتى بولا الادى»، - دەدى ورتالىق وكىلى.

سونىمەن قاتار گ. اسانبايەۆا تاعىلىمداماعا جىبەرىلەتىن ادامداردان اعىلشىن ءتىلى سەرتيفيكاتىن حالىقارالىق باعدارلامالار ورتالىعى تالاپ ەتپەيتىنىن ايتتى.

«تاعىلىمداما بويىنشا ءبىز ول سەرتيفيكاتتى تالاپ ەتپەيمىز. سىزدەن اعىلشىن ءتىلى دەڭگەيىن دالەلدەۋ ءۇشىن شەتەلدەن شاقىرتىپ وتىرعان جوعارى وقۋ ورنى تالاپ ەتپەسە، ءبىز سۇرامايمىز. ويتكەنى بىزگە ۇمىتكەر دايىن شاقىرتۋ قۇجاتىمەن كەلىپ، كونكۋرسقا قاتىسادى. سوندىقتان ءبىز اعىلشىن ءتىلى سەرتيفيكاتى بويىنشا تالاپ قويمايمىز»، - دەدى ورتالىق وكىلى.

شەتەلدە تاعىلىمدامادان ءوتۋدىڭ ەڭ ۇزاق مەرزىمى 12 اي، ال قىسقا مەرزىمى ءبىر اي بولادى.

بۇدان بۇرىن حابارلانعانداي، «بولاشاق» باعدارلاماسى بويىنشا جۋرناليستەر، رەجيسەرلەر، وپەراتورلار، گرافيستەر الەمنىڭ جەتەكشى شەتەلدىك ۇيىمدارى مەن ج و و- لارىندا «وپەراتورلىق ونەر»، «رەجيسسۋرا»، «جۋرناليستيكا»، «ۆيزۋالدى اسەرلەر. 3d انيماتسيا» جانە ت. ب. ماماندىقتار بويىنشا بىلىكتىلىگىن ارتتىرۋعا مۇمكىندىگى بار.

تاعىلىمدامادان وتۋگە ۇمىتكەرلەردىڭ جالپى جۇمىس ءوتىلى ءۇش جىلدان كەم ەمەس بولۋى ءتيىس، سونىڭ ىشىندە سوڭعى 12 ايدا تاڭداعان ماماندىعى بويىنشا جۇمىس ىستەۋى ءتيىس. سونداي-اق شەتەلدىك ۇيىمنان شاقىرۋ مەن ناتيجەسى ۆ1 دەڭگەيىنەن كەم ەمەس قازتەست سەرتيفيكاتى بولۋ كەرەك.

تاعىلىمدامادان وتەتىن ب ا ق وكىلدەرىنىڭ شەتەلدەگى شىعىندارى وتەلەدى.