ەلدەگى شيپاجايلاردىڭ ۇشتەن ءبىرى مەملەكەتتىك تاپسىرىستان قاعىلۋى مۇمكىن

نۇر-سۇلتان. قازاقپارات - ەلدەگى شيپاجايلاردىڭ ۇشتەن ءبىرى مەملەكەتتىك تاپسىرىستان قاعىلۋى مۇمكىن.

بۇل جايىندا «Kazakh Tourism» ۇلتتىق كومپانياسىنىڭ باسقارما ءتوراعاسى تالعات امانبايەۆ استانادا وتكەن دوڭگەلەك ۇستەلدە ايتتى، دەپ حابارلايدى قازاقپارات ءتىلشىسى.

«زەرتتەۋ قورىتىندىسى بويىنشا، ەلدەگى شيپاجايلاردىڭ ۇشتەن ءبىر بولىگىنىڭ ءحالى مۇشكىل. وعان سەبەپ - يەلەرىندە دامۋعا ىنتا جوق. ەلىمىزدە 173 شيپاجاي بولسا، سونىڭ كوبى وتكەن عاسىردىڭ ەلۋىنشى جىلدارى سالىنعان. سودان بەرى جوندەۋ كورمەگەن، جاڭارماعان نىساندار كوپ»، - دەدى تالعات امانبايەۆ.

ايتۋىنشا، سوعان قاراماستان مەملەكەتتەن تاپسىرىس الىپ وتىرعان شيپاجايلار بار.

«شيپاجايلاردىڭ ءبارى مەملەكەتتەن تاپسىرىس الىپ وتىر. بۇل ادىلەتسىز. ويتكەنى كوبى مەملەكەتتىك تاپسىرىسقا سەنىپ، ارقانى كەڭگە سالىپ ءجۇر. ءبىز بەلگىلى ءبىر ولشەمدەرگە ساي كەلەتىن شيپاجايلارعا عانا مەملەكەتتىك تاپسىرىس بەرۋدى ۇسىندىق. ەسەسىنە ولارعا سالىقتان جەڭىلدىكتەر بەرىپ، ينۆەستيتسيالىق ارتىقشىلىقتار كورسەتەمىز»، - دەدى «Kazakh Tourism» باسشىسى.

اتالعان شارادا تالعات امانبايەۆ نۇر-سۇلتان قالاسىندا مەديتسينالىق تۋرزيمنىڭ ارنايى ەكونوميكالىق ايماعىن قۇرۋدى ۇسىندى.