قازاقستان ۇلتتىق بانكى العاشقى ماكروەكونوميكالىق ساۋالنامانىڭ ناتيجەلەرىن جاريالادى
ساراپشىلار قاۋىمداستىعىمەن ديالوگ ورناتۋ رەتتەۋشى مەن نارىق اراسىنداعى اقپاراتتىق اسيممەتريانى مەيىلىنشە ازايتۋعا باعىتتالىپ وتىر.
بۇل تۋرالى قازاقپارت ۇلتتىق بانكتىڭ باسپا ءسوز قىزمەتىنە سىلتەمە جاساپ حابارلايدى.
ساۋالناماعا قازاقستان بويىنشا ماكروەكونوميكالىق كورسەتكىشتەردى تالداپ، بولجاۋمەن اينالىساتىن 11 ۇيىم قاتىستى. رەسپوندەنتتەر قاتارىنا نارىقتاعى كاسىبي قاتىسۋشىلار، زەرتتەۋ ينستيتۋتتارى، حالىقارالىق ۇيىمدار مەن رەيتينگتىك اگەنتتىكتەر كىردى. كەلەشەكتە بۇل ءتىزىمنىڭ اياسى كەڭەيتىلۋى مۇمكىن.
ماكروەكونوميكالىق ساۋالنامادا ۇلتتىق بانكتىڭ بولجامدارى قامتىلمايتىنىن اتاپ وتكەن ءجون. وندا ىشكى جانە الەمدىك نارىقتارداعى جاعدايىڭ كەلەشەك دامۋىنا قاتىستى نارىقتاعى كاسىبي قاتىسۋشىلاردىڭ تاۋەلسىز پىكىرىنە، باعالاۋلارى مەن كۇتۋلەرىنە شولۋ جاسالعان.
ساۋالنامانى ۇلتتىق بانكتىڭ بولجامدارمەن قوسا جاريالاناتىن بازالىق مولشەرلەمە بويىنشا شەشىمدەر الدىندا جىلىنا كەمىندە 4 رەت تۇراقتى تۇردە جۇرگىزۋ جوسپارلانىپ وتىر. ونىڭ ناتيجەلەرى ق ۇ ب- تىڭ رەسمي سايتىندا «ۇلتتىق بانكتىڭ ماكروەكونوميكالىق ساۋالناماسى» بولىمىندە جاريالانادى.
بۇدان ءارى رەسپوندەنتتەردىڭ بولجامىنا نەگىزدەلگەن دەرەكتەردىڭ جيناقتالۋىنا قاراي جاريالانىمداعى اقپارات تولىقتىرىلىپ وتىرادى. اقشا-كرەديت ساياساتى تۋرالى بايانداما جاريالانعاننان كەيىن العىشارتتار مەن بولجامداردى تالقىلاۋ ءۇشىن ساۋالناماعا قاتىسۋشىلارمەن كەزدەسۋ وتكىزۋ جوسپاردا بار.
