الماتىدا سالىنىپ جاتقان تاعى ءبىر تۇرعىن ءۇي كەشەنىنىڭ قۇرىلىسى توقتاتىلۋى مۇمكىن

الماتى. قازاقپارات - المالى اۋدانىنىڭ تۇرعىندارى قالانىڭ تاريحي ورتالىعىنداعى قوناقۇي ورنىنا تۇرعىن ءۇي كەشەنىنىڭ سالىنىپ جاتقانىنا شاعىمداندى، دەپ حابارلايدى قازاقپارات ءتىلشىسى.

تۇرعىندار الماتى اكىمى ەربولات دوسايەۆپەن كەزدەسۋ بارىسىندا رايىمبەك، 172 مەكەنجايى بويىنشا شاعىن ءقوناقۇي ورنىنا ۇلكەن تۇرعىن ءۇي كەشەنى سالىنىپ جاتقانىن ءمالىم ەتتى.

«بىزدە كولىك قوياتىن جەر قالعان جوق. جاڭادان سالىنعالى جاتقان كوپقاباتتى ءۇيدىڭ ىرگەتاسىنىڭ شۇڭقىرى ءبىزدىڭ ۇيدەن 8 مەتر جەردە ورنالاسقان»، - دەدى اۋدان تۇرعىنى.

اكىمنىڭ ورىنباسارى مۇحيت ازىربايەۆ تۇرعىن ءۇي كەشەنى «ديال- ستروي» كومپانياسىنىڭ جوباسى ەكەنىن، بۇل قۇرىلىسقا اكىمدىك رۇقسات بەرمەگەنىن جەتكىزدى. ايتۋىنشا، سول ماڭدا تاعى 2 قۇرىلىس سالۋشى جوبا باستاعان. وسى ورايدا، كۆارتالدىڭ (كيروۆ اتىنداعى زاۋىتتىڭ تومەنگى جاعى، رايىمبەك، مۇراتبايەۆ پەن سەيفۋللين كوشەلەرىنىڭ جوعارعى بولىگى) تولىعىمەن باس جوسپارعا سايكەستىگى زەرتتەلە باستاعان.

«قالا باسشىلىعى قۇرىلىسقا رۇقسات بەرمەگەنىن رەسمي تۇردە مالىمدەپ وتىر. جاڭا عانا سىزدەرگە بۇكىل كۆارتال قالانىڭ باس جوسپارى بويىنشا قارالاتىنى ايتىلدى»، - دەدى الماتى اكىمى ەربولات دوسايەۆ.

اكىم جاۋاپتى باسقارمالار پروكۋراتۋرامەن بىرلەسىپ، قۇرىلىس الاڭىن تەكسەرەتىنىنە ۋادە بەردى.

ەسكە سالساق، الماتىنىڭ ناۋرىزباي اۋدانىنداعى زاڭسىز سالىنعان «جايسان» تۇرعىن ءۇي كەشەنى سۇرىلەتىنى حابارلانعان.

سونداي- اق، سوت ناۋرىزباي اۋدانىنداعى «Qadam» تۇرعىن ءۇي كەشەنىن ءسۇرۋ جونىندە شەشىم شىعاردى . الماتى قالاسىنىڭ قالا قۇرىلىسىن باقىلاۋ باسقارماسى نىساندى تەكسەرىپ، ساۋلەت، قالاقۇرىلىسى جانە قۇرىلىس قىزمەتى سالاسىندا ءبىرقاتار زاڭ بۇزۋشىلىقتى انىقتاعان ەدى.