الماتىداعى بومبادان قورعاناتىن ورىندار قالپىنا كەلتىرىلمەك

الماتى. قازاقپارات - الماتىدا بارلىق تاريحي قۇندىلىقتاردى رەتكە كەلتىرۋگە ارنالعان جاڭا باعدارلاما ازىرلەنەدى. بۇل تۋرالى قالا اكىمى ەربولات دوسايەۆ ءمالىم ەتتى، دەپ حابارلايدى قازاقپارات ءتىلشىسى.

«المالى اۋدانى - قالانىڭ تاريحي ورتالىعى. بومبادان قورعاناتىن جەرلەر بولعان. بارلىق وركەنيەتتى ەلدەردەگىدەي وسى جەرلەردى قالپىنا كەلتىرۋ باعدارلاماسىن قاراستىرىپ، باستاما كوتەرۋگە بولا ما؟» - دەپ سۇرادى الماتى قالاسىنىڭ تۇرعىنى اكىممەن كەزدەسۋدە.

قالا اكىمىنىڭ ايتۋىنشا، بارلىق تاريحي قۇندىلىقتاردى رەتكە كەلتىرۋگە ارنالعان جاڭا باعدارلاما ازىرلەنەدى.

«بارلىق تاريحي قۇندىلىقتارىمىزدى رەتكە كەلتىرۋ ءۇشىن جەكە باعدارلاما ازىرلەنەتىن بولادى. جۇمىس باستالدى. مەملەكەت باسشىسى وسىنداي تاپسىرما بەردى. بۇل تەك وسى گەوساياسي وقيعالارعا بايلانىستى ەمەس، وعان توتەنشە جاعداي دا كىرەدى. ءبىز سەيسميكالىق بەلسەندى ايماقتا تۇرمىز، سوندىقتان قالا توتەنشە جاعدايعا دايىن بولۋى كەرەك. جەكە باعدارلاما بولادى، الداعى ءۇش جىلدا ءبىز ونى قاجەتتى ستاندارتتارعا جەتكىزۋگە تىرىسامىز»، - دەپ جاۋاپ بەردى اكىم.

اكىم بۇل باعدارلامانىڭ توتەنشە جاعدايلار دەپارتامەنتىمەن بىرلەسە ازىرلەنىپ جاتقانىن اتاپ ءوتتى.

«شىنىمدى ايتسام، بۇعان دەيىن بومبادان قورعاناتىن ورىندارعا كوپ قارجى بولىنبەيتىن. تەك قولداۋ ءۇشىن ازىن- اۋلاق اقشا بەرىلەتىن. ەشقاشان جوندەۋ، قايتا جابدىقتاۋ كورمەگەن. ءبىز قايتا قاراۋدى باستايمىز، ءبىراق ول قىمباتقا تۇسەدى. ءبىراق، بۇل - قالا ءۇشىن ماڭىزدى»، - دەدى اكىم.

اۆتور

الما مۇقانوۆا

instagram.com