ەلوردادا وڭىرلەردىڭ اۋىلشارۋاشىلىق جارمەڭكەلەرى باستالدى

نۇر-سۇلتان. قازاقپارات - ەرتەڭ ەلوردادا وڭىرلەردىڭ اۋىلشارۋاشىلىق جارمەڭكەلەرى باستالادى.

بۇل تۋرالى نۇر- سۇلتان قالالىق ينۆەستيتسيالار جانە كاسىپكەرلىكتى دامىتۋ باسقارماسى باستىعىنىڭ ورىنباسارى قۋانىش ساپاروۆ ايتتى، دەپ حابارلايدى قازاقپارات ءتىلشىسى.

«كونستيتۋتسيا كۇنى قارساڭىندا، 27-28-تامىز كۇندەرى جىلدا وتكىزىلەتىن اۋىل شارۋاشىلىعى جارمەڭكەسىن باستاعالى وتىرمىز. وسى كۇندەرى تۇركىستان وبلىسىنىڭ كاسىپكەرلەرى قالاعا 500 توننادان استام ونىمدەرىن اكەلەدى. جالپى، تۇركىستان وبلىسىنان 70-تەن استام كاسىپكەردىڭ قاتىسۋى جوسپارلانعان. ونىمدەر ەلورداداعى باعادان 15-20 پايىز تومەن. اۋىل شارۋاشىلىعى ونىمدەرىن وندىرۋشىلەر تىكەلەي استاناعا اكەلىپ، قالا تۇرعىندارىنا ساتادى. جارمەڭكە «استانا- ارەنا» ستاديونىنىڭ اۆتوتۇراق الاڭىندا وتەدى»، - دەدى قۋانىش ساپاروۆ ەلوردا اكىمدىگىنىڭ باسپا ءسوز قىزمەتى الاڭىندا وتكەن بريفينگىدە.

ونىڭ اتاپ وتۋىنشە، ەلورداداعى جارمەڭكە 12-قاراشاعا دەيىن جالعاسادى جانە وعان ەلىمىزدىڭ بارلىق ءوڭىرى قاتىسادى. 3-4-قىركۇيەكتە جامبىل وبلىسىنىڭ اۋىل شارۋاشىلىعى تاۋارلارىن وندىرۋشىلەرىنىڭ جارمەڭكەسى ۇيىمداستىرىلادى.

بريفينگىگە قاتىسقان تۇركىستان وبلىستىق اۋىل شارۋاشىلىعى باسقارماسى باستىعىنىڭ ورىنباسارى نۇربول بەكمۇراتوۆتىڭ دەرەگىنشە، وڭىردە 7 ايدا 339 ميلليارد تەڭگەنىڭ ءونىمىن وندىرگەن.

«جارمەڭكەگە تۇركىستان وبلىسىنان 70 تەن استام اۋىل شارۋاشىلىعى تاۋارلارىن وندىرۋشىلەرى 40-قا جۋىق جۇك كولىگىمەن كەلدى. ەكى كۇنگە سوزىلاتىن جارمەڭكەگە 478 ميلليون تەڭگەگە 500 توننادان استام ءونىم اكەلىندى. ونىڭ ىشىندە 165 توننا ەت، 70 توننا باقشا ونىمدەرى، 100 توننادان استام كورتوپ، كوكونىستەر، سونىمەن قاتار ءسۇت ونىمدەرى، شۇجىق، جۇمىرتقا بار»، - دەدى ول.