قۇرمانبەك باكيەۆتى وتانىنا قايتارمايدى
سوت باكيەۆتى ساياسي سەبەپپەن قۋدالاپ جاتىر دەگەن پىكىرگە كەلدى. قىرعىزستان ۇكىمەتى وسىمەن ءتورتىنشى رەت اۋىر قىلمىستار جاساعانى ءۇشىن ايىپتالعان بۇرىنعى ەل باسشىسىن ەلگە قايتارۋعا تىرىسقان.
قىرعىزستاننىڭ باس پروكۋراتۋراسى قۇمانبەك باكيەۆتى جازاعا تارتۋ ءۇشىن ءتورت رەت بەلارۋستىڭ ءتيىستى ورگاندارىنا ءوتىنىشحات تۇسىرگەن ەدى. كەزەكتى رەت بۇل ەلدىڭ ادىلەت جۇيەسى قىرعىزداردىڭ بۇل ارىزىن قاناعاتتاندىرۋدان باس تارتتى. ءبىراق بۇرىنعىدان ەرەكشەلىگى، بۇل جولى قۇرمانبەك باكيەۆ ساياسي سەبەپپەن ايىپتالعان دەگەن رەسمي تۇجىرىمداما بەرىلدى.
قىرعىزستاننىڭ بۇرىنعى پرەزيدەنتى 2010 -جىلى بولعان جاپپاي تارتىپسىزدىكتەن كەيىن بەلارۋسكە قاشىپ كەتكەن ەدى. ساراپشىلاردىڭ پىكىرىنشە، ونى ەلگە قايتارۋعا مۇمكىندىك جوق.
الينا مولدوكەيەۆا، ساياساتتانۋشى:
- مۇندا زارداپ شەككەن ادامدار بار. سول كۇندەرى قازا بولعانداردىڭ تۋىستارىن ايتاتىن بولساق، قۇرمانبەك باكيەۆتى قايتارۋ وتە قيىن ءىس. ءتىپتى اسقار اقايەۆ سەكىلدى بيلىكپەن كەلىسە السا دا، قۇرمانبەك باكيەۆكە قاتىستى جاعداي كۇردەلى.
قۇرمانبەك باكيەۆ بىرنەشە كىسى ولتىرگەن جانە قىزمەت بابىن اسىرا پايدالانعان دەپ ايىپتالىپ وتىر. 2010 -جىلى الا- توو الاڭىندا شەرۋدى كۇشپەن تاراتقاندا، 87 ادام وققا ۇشىپ، قازا تاپتى، ەكى جۇزدەن اسا ادام جارالانعان. وعان قوسا، بۇرىنعى پرەزيدەنت ءوز اكىمشىلىگىنىڭ بۇرىنعى جەتەكشىسى مەدەت سادىرقۇلوۆ جانە حالىقارالىق ستراتەگيالىق زەرتتەۋلەر ينستيتۋتىنىڭ بۇرىنعى ديرەكتورى سەرگەي سلەپچەنكونى ولتىرگەنى ءۇشىن ايىپتالعان.
بىشكەك اسكەري سوتى قۇرمانبەك باكيەۆتى 30 جىلعا باس بوستاندىعىنان ايىرۋ جازاسىن شىعارعان بولاتىن. سوندىقتان ول ەل شەكاراسىنان اسسا بولدى، بىردەن قاماۋعا الىنادى. تاپ سولاي ەلدەن قاشقان تۇڭعىش پرەزيدەنت اسقار اقايەۆتىڭ قۇرمانبەك باكيەۆتەن ءبىر ايىرماشىلىعى، ول ەلگە قايتقان جاعدايدا، ەركىندىكتە قالادى.
ەركين سادانبەكوۆ، زاڭگەر:
- اقايەۆ اسا اۋىر قىلمىستار بويىنشا ايىپتالعان جوق، سوندىقتان ۇكىمەت ودان جاۋاپ الۋ ءۇشىن قىرعىز رەسپۋبليكاسىنا شاقىرتۋ جونىندە شەشىم قابىلدادى. ول شەكارادان ءوتىپ، قۇقىق قورعاۋ ورگاندارىنا كۋمتور وپەرەيتينگ كومپاني بويىنشا ءتيىستى تۇسىنىكتەمە بەردى. قىلمىستارى ءۇشىن جازاعا تارتۋ مەرزىمى وتكەندىكتەن اسقار اقايەۆقا تاعىلعان ەش ايىپ جوق. وعان قوسا، بۇرىنعى پرەزيدەنت كانادالىق ينۆەستور كۋمتور التىن كەنىشىن قالاي يگەرە باستاعانى جايلى تەرگەۋشىلەرگە ايتىپ بەردى.
دەگەنمەن اسقار اقايەۆ قىرعىزستاندا قالماستان، سوڭعى جىلدارى تۇرىپ جاتقان رەسەيدىڭ ماسكەۋ قالاسىنا ورالدى.
www.24.kz
