ءاليحان سمايىلوۆ ر ف ۇكىمەتىنىڭ ءتوراعاسى ميحايل ميشۋستينمەن كەزدەسۋ وتكىزدى

نۇر- سۇلتان. قازاقپارات - شولپان- اتادا (قىرعىزستان) ءوتىپ جاتقان ەۋرازيالىق ۇكىمەتارالىق كەڭەس وتىرىسى الاڭىندا ق ر پرەمەر- ءمينيسترى ءاليحان سمايىلوۆ ر ف ۇكىمەتىنىڭ ءتوراعاسى ميحايل ميشۋستينمەن كەزدەسۋ وتكىزدى، دەپ حابارلايدى ق ر ۇكىمەتىنىڭ باسپا ءسوز قىزمەتى.

ءاليحان سمايىلوۆ قازاقستان مەن رەسەي ىنتىماقتاستىعىنىڭ نىعايۋىنا جوعارى دەڭگەيدەگى تۇراقتى كەزدەسۋلەردىڭ سەرپىن بەرىپ وتىرعانىن، سونداي- اق ەكى ەل اراسىنداعى مەملەكەتارالىق بايلانىستار بارلىق باعىتتار بويىنشا ءوزارا ءىس- قيمىلدىڭ جوعارى دەڭگەيىنە كوتەرىلگەنىن اتاپ ءوتتى.

«ءوزارا مۇددەلەردى ەسكەرە وتىرىپ، دايەكتى بىرلەسكەن جۇمىستى جالعاستىرۋىمىز كەرەك»، - دەدى پرەمەر- مينيستر.

ۇكىمەت باسشىسى وتكەن 30 جىل ىشىندە مەملەكەتتەر اراسىندا سەنىمدى جانە سىندارلى ديالوگ ورناتىلعانىن اتاپ ءوتتى. ساۋدا- ەكونوميكالىق ىنتىماقتاستىق قارقىندى دامىپ كەلەدى، ءوڭىرارالىق ىنتىماقتاستىق جانە ىسكەر توپتاردىڭ بايلانىستارى نىعايۋدا.

«رەسەي - ءبىزدىڭ نەگىزگى ساۋدا- ەكونوميكالىق سەرىكتەسىمىز. 2021 -جىلدىڭ قورىتىندىسى بويىنشا ءوزارا تاۋار اينالىمى ۇشتەن بىرگە ءوسىپ، $24,2 ميلليارد كولەمىندە رەكوردتىق كورسەتكىشكە قول جەتكىزدىك. 2022 -جىلدىڭ ءبىرىنشى جارتىجىلدىعىندا دا ساۋدا % 5- عا ارتتى. جىل قورىتىندىسى بويىنشا وڭ قارقىن ساقتالىپ، داميتىنىنا سەنىم ارتامىز»، - دەدى ءاليحان سمايىلوۆ.

سونىمەن قاتار پرەمەر- مينيستر اعىمداعى جاعدايدا ەكىجاقتى ساۋدا- ەكونوميكالىق بايلانىستاردىڭ كۇن تارتىبىنە جەدەل، سالماقتى جانە ءوزارا ءتيىمدى شەشىمدەردى قاجەت ەتەتىن جاڭا تارماقتار شىعارىلاتىنىن ايتتى.

«ءبىز پراگماتيكالىق جانە سەنىمدى ارنادا جۇيەلى، بىرلەسكەن جۇمىستى جالعاستىرۋىمىز كەرەك»، - دەپ اتاپ ءوتتى ءاليحان سمايىلوۆ.

ءوز كەزەگىندە ميحايل ميشۋستين رەسەيدىڭ قازاقستانمەن تاتۋ كورشىلىگى مەن دوستىعىن باعالايتىنىن اتاپ ءوتتى.

«ءبىز يمپورتتى الماستىرۋ بويىنشا بىرلەسكەن باعدارلامالاردى جۇزەگە اسىرۋدىڭ جاقسى پەرسپەكتيۆالارىن كورىپ وتىرمىز. ونەركاسىپ، ەنەرگەتيكا، ماشينا جاساۋ، كولىك ينفراقۇرىلىمى، بەيبىت اتوم، سيفرلاندىرۋ سياقتى سالالاردا جاڭا ستراتەگيالىق جوبالاردى ىسكە قوسۋ ءۇشىن مۇمكىندىكتەر بار. اتالعان ماسەلەلەر ءبىزدىڭ تۇراقتى نازارىمىزدا»، - دەدى ميحايل ميشۋستين.

كەلىسسوز بارىسىندا تاراپتار ونەركاسىپتىك كووپەراتسياعا قاجەتتى ونىمدەردى جەتكىزۋ، قازاقستاندىق شيكىزات ترانزيتى، سونداي- اق تاۋارلاردى كەدەرگىسىز شىعارۋ ماسەلەلەرىن تالقىلادى. سونداي- اق قازاقستاننىڭ سولتۇستىك جانە شىعىس وڭىرلەرىن گازداندىرۋ ماسەلەلەرى، كاسپيي قۇبىر كونسورتسيۋمى مەن «استراحان- ماڭعىشلاق» ماگيسترالدىق سۋ تارتقىشىنىڭ قىزمەتى قارالدى.

فوتو: primeminister.kz

رەداكتور

ەربول جانات