ەركىن كۇرەستەن الەم چەمپيوناتىنا قاتىساتىن ەل قۇراماسىندا كىمدەر بار

قىزىلوردا. قازاقپارات - سەربيادا وتەتىن ەركىن كۇرەستەن الەم چەمپيوناتىنا قاتىساتىن ەل قۇراماسىنىڭ قۇرامى بەلگىلى بولدى، دەپ حابارلايدى قازاقپارات ءتىلشىسى.

ءدۇبىرلى دودا 10-18 قىركۇيەك ارالىعىندا سەربيا استاناسى بەلگراد قالاسىندا وتەدى.

الەم چەمپيوناتىندا ەل قۇراماسى ساپىندا راحات قالجان (57 كەلى)، اسىل ايتاقىن (61 كەلى)، ءادىل وسپانوۆ (65 كەلى)، سىرباز تالعات (70 كەلى)، نۇرقوجا قايپانوۆ (74 كەلى)، بولات ساقايەۆ (79 كەلى)، ازامات داۋلەتبەكوۆ (86 كەلى)، ادىلەت داۋلىمبايەۆ (92 كەلى)، مامەد يبراگيموۆ (97 كەلى)، ولەگ بولتين (125 كەلى) سىنعا تۇسەدى.

كۇرەس تۇرلەرىنەن بىرىككەن الەم چەمپيوناتى 2005 -جىلدان بەرى تۇراقتى وتكىزىلىپ كەلەدى. ال ودان بۇرىن گرەك- ريم كۇرەسىنەن 1904، ەركىن كۇرەستەن 1951، ايەلدەر كۇرەسىنەن 1987 -جىلدان بەرى ۇيىمداستىرىلعان.

قازىرگە دەيىن قازاقستاندىق بالۋاندار 54 (5 التىن، 18 كۇمىس,31 قولا) مەدال الدى. جالپى كوماندالىق ەسەپتە جۇلدەگە ىلىككەن 67 مەملەكەتتىڭ اراسىندا 32 ورىندا تۇر.

ەسكە سالساق، بۇدان بۇرىن قازاقستاندىق بالۋان جاستار اراسىندا الەم چەمپيوناتىنىڭ كۇمىس جۇلدەگەرى اتاندى.