ەلدە كومىر تاپشى بولا ما؟

نۇر-سۇلتان. قازاقپارات - بيىل تاعى دا كومىردەن تارشىلىق كورمەس ءۇشىن تۇرعىندار قىسقا ەرتەرەك قامدانعانى ءجون.

ايتپەسە، ءوندىرىس ورىندارى نارىقتاعى سۇرانىسقا ۇلگەرمەي قالۋى مۇمكىن. سالا ماماندارى وسىلاي دەيدى، دەپ حابارلايدى «حابار 24».

قازىر قارا وتىندى وڭىرلەرگە كۇن سۋىتپاي تۇرىپ جەتكىزۋ جۇمىستارى جۇرگىزىلىپ جاتىر. جىل باسىنان بەرى ىشكى نارىققا 4,5 ميلليون توننا كومىر جونەلتىلگەن. بۇل وتكەن جىلمەن سالىستىرعاندا 10 پروتسەنتكە كوپ. ودان بولەك، ەندى قارا وتىن الىس-جاقىن ايماقتارعا تەك تەمىرجول ارقىلى تاسىمالدانادى. كومىردىڭ ءبىر تونناسى ءوندىرىس ورنىنان شامامەن 6-7 مىڭ تەڭگەدەن شىعادى. وسىلايشا، نارىقتاعى باعا وتكەن جىلمەن شامالاس بولماق.

ەلىمىزدە جىل سايىن 110 ميلليون توننا كومىر وندىرىلەدى، سونىڭ 30 پروتسەنتكە جۋىعى ەكسپورتتالادى.

ءىلياس وسپانوۆ، ق ر ي ي د م يندۋستريالىق دامۋ كوميتەتىنىڭ ءتوراعاسى:

- وتكەن جىلى ىشكى نارىقتا ساتىلۋعا ءتيىس كومىرلەردىڭ ءبىر بولىگى شەكارا اسىپ كەتكەنى انىقتالدى. ماسەلەن، ايشا ءبيبى، سىپاتاي باتىر كەدەندىك باقىلاۋ بەكەتتەرىندە 120 مىڭ توننا شيكىزات قىرعىزستانعا ءوتىپ كەتكەن. بۇعان جول بەرمەۋ كەرەك. قازىر ەلدەن تەك ءوندىرىس ورىندارىنا ارنالعان كومىر عانا ەكسپورتالادى. ودان بولەك، تۇرعىندارعا كۇن سۋىتپاي تۇرىپ، كومىر قورىن جيناپ الۋ كەرەك ەكەنىن ەسكەرتكىم كەلەدى.