الماتىدا جوق پاتەردى جالعا بەرىپ كەلگەن الاياق ۇستالدى
الماتى قالاسى پ د كريمينالدىق پوليتسيا باسقارماسىنىڭ باستىعى قۋاتبەك ناۋاتوۆتىڭ مالىمەتىنشە، 48 جاستاعى ەر ادام 9 ازاماتتى الداپ ۇلگەرگەن.
«ا. ەسىمدى ازامات الماتىدا جوق پاتەرلەردى جالعا بەرگەن. الاياقتىق فاكتىسى تۋرالى شاھاردىڭ بىرنەشە تۇرعىنى پوليتسياعا حابارلاسقاننان كەيىن بەلگىلى بولدى. بارلىعىنىڭ وقيعاسى بىردەي. پاتەر جالداۋعا تىرىسقان ولار تانىمال ينتەرنەت-سەرۆيستەن حابارلاندىرۋلاردى ىزدەپ تاۋىپ، نارىقتاعى باعادان تومەن باعا ۇسىنعان ادامعا تەلەفون سوعادى. «ءۇي يەسى» كليەنتتەردىڭ كوپتىگىن العا تارتىپ، پاتەردى ءبىرىنشى بولىپ اقشا تولەگەن ادامعا بەرەتىنىن ايتىپ الداپ سوققان. كۇدىكتى اقشانى العاننان كەيىن بىردەن بايلانىسقا شىعۋىن توقتاتىپ، ۇيالى تەلەفون ءنومىرىن اۋىستىرىپ وتىرعان»، - دەيدى الماتى قالالىق پ د كريمينالدىق پوليتسيا باسقارماسىنىڭ باستىعى قۋاتبەك ناۋاتوۆ.
ونىڭ ايتۋىنشا، المالى اۋداندىق پوليتسيا باسقارماسىندا الاياقتىق دەرەگى بويىنشا قىلمىستىق ءىس تىركەلدى. ءىس جۇرگىزۋ بارىسىندا ونىڭ وسىعان ۇقساس 9 ەپيزودقا قاتىسى بار ەكەندىگى انىقتالدى. كەلتىرىلگەن شىعىننىڭ جالپى سوماسى 530 مىڭ تەڭگە.
«كۇدىكتى ۋاقىتشا ۇستاۋ يزولياتورىنا قامالدى. قوسىمشا تەرگەۋ جۇرگىزىلۋدە»، - دەدى قۋاتبەك ناۋاتوۆ.
بۇعان دەيىن قازاقستان ريەلتورلار قاۋىمداستىعىنىڭ مامانى پاتەر جالداعاندا الاياقتارعا ۇرىنباۋدىڭ بىرنەشە جولى بار ەكەنىن ايتقان بولاتىن.
