ادىلەت ءمينيسترى: ساياسي پارتيالار قىزمەتىنە قاتىستى زاڭ جوباسى ازىرلەنىپ جاتىر
بۇل تۋرالى بۇگىن ق ر ادىلەت ءمينيسترى قانات مۋسين ەلوردادا حالىقپەن كەزدەسۋ كەزىندە ايتتى، دەپ حابارلايدى قازاقپارات ءتىلشىسى.
«قازاقستان حالقى اسسامبلەياسىنىڭ قىزمەتىن رەتتەيتىن زاڭنامالىق اكتىلەرگە وزگەرىستەر ەنگىزىلەتىن زاڭ جوباسى، ساياسي پارتيالاردىڭ، جوعارى سوت كەڭەسىنىڭ، جەرگىلىكتى مەملەكەتتىك باسقارۋ ورگاندارىنىڭ قىزمەتىنە قاتىستى، ەسەپ كوميتەتىن جوعارى اۋديتورلىق پالاتا رەتىندە قايتا قۇرۋ، سونداي-اق حالىقتىڭ جەرگە مەنشىك قۇقىعىمەن بايلانىستى زاڭ جوباسى ازىرلەنىپ جاتىر»، - دەدى ق. مۋسين.
بۇدان باسقا، «قازاقستان رەسپۋبليكاسىنىڭ اكىمشىلىك قۇقىق بۇزۋشىلىقتار تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا ازىرلەنىپ جاتىر.
قازىرگى ۋاقىتتا اتالعان زاڭ جوبالارى ۇكىمەتتىڭ قاراۋىندا. زاڭ جوبالارى جاقىن ارادا پارلامەنتكە ەنگىزىلمەك. بۇل قۇجاتتار بيىلدىڭ سوڭىنا دەيىن قابىلدانادى دەپ جوسپارلانعان.
سونىمەن قاتار، پرەزيدەنتتىڭ مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى جارلىعىن جۇزەگە اسىرۋ ماقساتىندا ءبىراز تاسىلدەر ازىرلەندى. ونىڭ ىشىندە ۇكىمەتكە داعدارىس جاعدايلارىندا زاڭ كۇشى بار ۋاقىتشا اكتىلەردى قابىلداۋ قۇزىرەتىن بەرۋ، سونداي-اق مەرزىمدەر مەن كەزەڭدەردى ەكى ەسە قىسقارتا وتىرىپ، نورما تۇزۋشىلىك پروتسەسىن وڭتايلاندىرۋ قاراستىرىلدى.
بۇدان بۇرىن حابارلانعانداي، بيىل ماۋسىم ايىندا پرەزيدەنت جوعارى اۋديتورلىق پالاتا قۇرۋعا قاتىستى تاپسىرما بەردى.
