قازاقستاندا جاڭا ەكى پارتيا تىركەلۋى مۇمكىن
«2019-جىلدان بەرى ادىلەت مينيسترلىگىنە 17 پارتيانى تىركەۋگە قاتىستى باستاماشى توپتان ءوتىنىم كەلىپ، قۇجات تاپسىرىلدى. قازىرگى ۋاقىتتا ەكەۋى ءبىرىنشى كەزەڭنەن ءوتىپ، پارتيا قۇرۋ ماسەلەسىمەن اينالىسىپ جاتىر. وسى ورايدا «حالىق دەربەستىگى» مەن «نامىس» ءبىرىنشى كەزەڭدەگى جۇمىستاردى اتقاردى»، - دەدى ق. مۋسين ەلوردادا وتكەن باسپا ءسوز ءماسليحاتىندا.
وسى ورايدا ول زاڭناما بويىنشا پارتيانى تىركەۋ ءراسىمى ەكى كەزەڭنەن تۇراتىنىن ەسكە سالدى. بىرىنشىدەن، پارتيا قۇرۋ نيەتى تۋرالى حابارلاما بەرىلەدى، وعان 1 مىڭ ادامنىڭ ءتىزىمى قوسىلۋى كەرەك. بۇل مالىمەتتەردى ادىلەت مينيسترلىگى تەكسەرەدى.
«بۇل ءتىزىمنىڭ اراسىندا ومىردەن وتكەن ادامدار، قۇقىق قورعاۋ ورگاندارى مەن اسكەري قىزمەتشىلەر بولماۋى كەرەك. زاڭ بويىنشا بۇل ادامدارعا پارتياعا مۇشە بولۋعا تىيىم سالىنعان. سونىمەن قاتار، كامەلەتكە تولماعان بالالار مەن باسقا پارتيانىڭ مۇشەلەرى اتالعان تىزىمگە قوسىلمايدى. تەكسەرۋ بارىسىندا بۇل ادامدار تىزىمدە بولسا، باستاماشى توپتىڭ قۇرامىنداعىلار 1 مىڭنان ازايىپ قالسا، وندا مينيسترلىك قۇجاتتاردى قايتارادى»، - دەدى مينيستر.
ق. مۋسيننىڭ ايتۋىنشا، بۇل جاعدايدا باستاماشى توپتى قايتا قۇرىپ، اتالمىش كەمشىلىكتەردى جويىپ، قۇجاتتاردى قايتا تاپسىرۋعا بولادى.
«قۇجاتتار دۇرىس تاپسىرىلسا، وندا باستاماشى توپتىڭ قۇجاتتارى ەكىنشى كەزەڭگە وتەدى. ولار پارتيانىڭ سەزدەرىن وتكىزىپ، وڭىرلەردە فيليلالدارىن اشىپ، مۇشەلەرىن تىركەپ، ءتيىستى قۇجاتتاردى مينيسترلىككە وتكىزەدى. سونىمەن قاتار، زاڭ بويىنشا پارتيا مۇشەلەرىنىڭ سانى 20 مىڭ بولۋى ءتيىس»، - دەدى ۆەدومستۆو باسشىسى.
«پارلامەنتكە ەنگىزىلگەن زاڭ جوباسىندا پرەزيدەنتتىڭ باستاماشىلىعىمەن ءتيىستى وزگەرىستەر ەسكەرىلگەن. زاڭ قابىلدانعاننان كەيىن، باستاماشى توپ تىزىمىندەگىلەر سانى 1 مىڭنان 700 ادامعا دەيىن كەميدى. ال تىركەۋ مۇمكىندىگىن ارتتىرۋ ءۇشىن پارتيا مۇشەلەرىنىڭ سانى 20 مىڭنان 5 مىڭعا دەيىن ازايادى. سوندىقتان پارتيا تىركەۋ ءراسىمى جەڭىلدەيدى. قازىرگى ۋاقىتتا اتالعان ەكى پارتيا سەز وتكىزۋ ارەكەتىن جاساپ جاتىر»، - دەدى قانات مۋسين.
