بەكبولات تىلەۋحان ايتقان ەكى كىتاپ نە تۋرالى؟

نۇر-سۇلتان. قازاقپارات - بەكبولات تىلەۋحان تاياۋداعى سۇحباتى بارىسىندا جۋرناليست نارتاي ارالباي ۇلىنان «كونەتس ۆلاستي» مەن «وكنا وۆەرتونا» كىتاپتارىن وقىدىڭ با» دەپ سۇرايدى.

قازنەت قولدانۋشىلارى بۇل كىتاپتاردى وقىماعانىن ايتىپ جاتىر.

كونەتس ۆلاستي

كونەتس ۆلاستي. ءتۇپنۇسقا اتاۋى - The End of Power، بيلىك سوڭى دەپ اۋدارۋعا بولادى.

ونىڭ اۆتورى - نايم مويزەس. كىتاپ 2013 -جىلى جارىق كورگەن، ورىس تىلىنە 2016 -جىلى اۋدارىلىپتى.

نايم مويزەس - بەلگىلى ۆەنەسۋەلالىق جۋرناليست جانە ساياساتتانۋشى، فرانسيا، يتاليا، ارگەنتينا جانە ۆەنەسۋەلا وردەندەرىنىڭ يەگەرى. بۇرىن ءوز ەلىندە ساۋدا جانە ونەركاسىپ ءمينيسترى، ۆەنەسۋەلا ورتالىق بانكىنىڭ ديرەكتورى جانە دۇنيەجۇزىلىك بانكتىڭ اتقارۋشى ديرەكتورى بولعان. 14 جىل بويى ول Foreign Policy جۋرنالىن باسقاردى، 2011 -جىلدان باستاپ الەمدىك ساياساتتاعى ەڭ وزەكتى وقيعالارعا ارنالعان اپتالىق Naim Effect جۋرنالىن جۇرگىزەدى.

ەندى كونەتس ۆلاستي كىتابىنا توقتالساق. كىتاپ بيلىككە جەتۋدىڭ، پايدالانۋدىڭ جانە ونى جوعالتۋدىڭ ءداستۇرلى ەمەس ادىستەرىن، ونىڭ ءتۇپنۇسقا جانە دالەلدى تالداۋىن ۇسىنادى. وندا بيلىكتىڭ وزگەرۋى ءبىزدىڭ كۇندەلىكتى ومىرىمىزگە قالاي اسەر ەتەتىنىن تۇسىندىرەدى. نايم بۇل كىتاپتا بارلىق كوشباسشى - ساياساتتا، بيزنەستە، اسكەردە، دىندە - بۇرىنعىعا قاراعاندا الدەقايدا كۇشتى بولعانىمەن، قيىن ماسەلەلەرمەن بەتپە- بەت كەلە جاتقانىن ايتادى.

ميللياردەر مارك سۋكەربەرگ 2015 -جىلدىڭ كىتابى تىزىمىندە «كونەتس ۆلاستي« تۋىندىسىن ءبىرىنشى ورىنعا قويعان. Financial Times جانە The Washington Post 2013 -جىلدىڭ ەڭ ۇزدىك كىتابى دەپ وسى كونەتس ۆلاستي كىتابىن اتاعان.

وكنو وۆەرتونا

بەكبولات تىلەۋحان ايتقان ەكىنشى كىتاپ - ساياسي تريللەر وكنو وۆەرتونا. كىتاپتىڭ ءتۇپنۇسقا اتاۋى - The Overton Window, قازاقشالاساق وۆەرتون تەرەزەسى بولادى. اۆتورى - گلەنن بەك. ساياسات سالاسىنداعى تەلەجۇرگىزۋشى، بىرنەشە جىلدان بەرى بۇكىل ۇلتتىق جاڭالىقتار باعدارلاماسىن جۇرگىزەدى. سونىمەن قاتار، ول - شىعارماشىل جازۋشى، كىتاپتارى بىرنەشە رەت بەستسەللەر تىزىمىندە ءبىرىنشى ورىنعا شىققان.

ونىڭ The Overton Window كىتابى 2010 -جىلى 15-ماۋسىمدا شىعىپ، بىردەن بەستسەللەرگە اينالدى، قىركۇيەككە دەيىن ساتىلىم كوشباسشىسى بولىپ تۇرعان.

ساياسي تريللەردىڭ سيۋجەتى مىناداي: كىتاپتىڭ باستى كەيىپكەرى - نوي گاردنەر، ول ساياساتقا مۇلدە قىزىقپايدى، قوعاممەن بايلانىس جونىندەگى ءبولىم باسشىسى بولىپ جۇمىس ىستەيدى. ول موللي روسسپەن تانىسادى، ايەل ءبىز بىلەتىن امەريكا قۇراما شتاتتارى تاياۋ ارادا جوق بولادى دەگەن اقپاراتقا قاتتى سەنەدى. ءبىراق گاردنەر ونى قاستاندىق تەورياسى دەپ ويلايدى دا، ايەلگە سەنبەيدى. دەگەنمەن، ا ق ش- قا جاسالعان شابۋىلدان كەيىن ول بۇل قاستاندىقتى كىمدەر جاساعانىن انىقتاۋ ءۇشىن ەڭبەك ەتەدى.

2013 -جىلى كىتاپتىڭ Eye of Moloch دەپ اتالاتىن سيكۆەلى جاريالانعان.

Massaget.kz