قايرات قۇدايبەرگەندى قاماۋعا الۋ مەرزىمى تاعى ۇزارتىلدى
بۇل تۋرالى الماتى قالالىق سوتىنىڭ باسپا ءسوز قىزمەتى ءمالىم ەتتى.
«16- تامىز كۇنى الماتى قالالىق تەرگەۋ سوتىنىڭ قاۋلىسىمەن كۇدىكتىنى قاماۋدا ۇستاۋ مەرزىمى ەكى ايعا ۇزارتىلدى. قاماۋ مەرزىمى - 2022-جىلدىڭ 21- قازانىنا دەيىن»، - دەپ حابارلادى الماتى سوتىنىڭ باسپا ءسوز قىزمەتىنەن.
بۇعان دەيىن كۇدىكتىنى قاماۋ مەرزىمى ءبىر ايعا ۇزارتىلعان بولاتىن.
ايتا كەتەيىك، 24- ءساۋىر كۇنى سوت قاۋلىسىمەن تەرگەۋ ورگاندارىنىڭ ءوتىنىشى قاناعاتتاندىرىلىپ، قايرات قۇدايبەرگەنگە قاتىستى ارەكەتتى سارالاۋ تۋرالى قاۋلى شىعارىلعانعا دەيىن ونى 30 تاۋلىك مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىنا سانكسيا بەرىلگەن بولاتىن.
ەسكە سالساق، قايرات قۇدايبەرگەننىڭ ۇستالعانى تۋرالى اقپارات 22- ساۋىردە پايدا بولعان ەدى. كەيىن ق ر باس پروكۋراتۋراسى الماتى قالاسى ءماسليحاتىنىڭ دەپۋتاتى قايرات قۇدايبەرگەن قاڭتار وقيعاسىنىڭ ءىسى بويىنشا ۇستالعانىن راستادى.
قايرات قۇدايبەرگەن ديكي ارمانمەن بىرگە ادام جيناۋدى ۇيىمداستىرعان دەپ حابارلاندى.
