ۇلتتىق «ايبوز» ادەبي سىيلىعىنىڭ جەڭىمپازىنا قانشا ميلليون تەڭگە بەرىلەدى
وتىنىمدەر 1- قازانعا دەيىن قابىلدانادى، دەپ حابارلايدى قازاقپارات ءتىلشىسى.
«بيىل 15- ماۋسىمدا مادەنيەت جانە سپورت ءمينيسترى داۋرەن ابايەۆ زيالى قاۋىم وكىلدەرىمەن، اقىن-جازۋشىلار، جۋرناليستەرمەن كەزدەسىپ، ەلىمىزدە تۇڭعىش رەت وسى «ايبوز» ۇلتتىق ادەبي سىيلىعى تاعايىندالاتىنىن جاريالاعان ەدى. سودان بەرى ەكى اي ءوتتى، ەندى بىزدە ءبىر اي مەرزىم قالدى. ۇلتتىق ادەبي سىيلىقتا «ۇزدىك پروزا»، «ۇزدىك پوەزيا»، «ۇزدىك دراما»، «ۇزدىك اۋدارما»، «ۇزدىك بالالار ادەبيەتى»، «ۇزدىك كوميكس» جانە «ۇزدىك كىتاپ» نوميناتسيالارى بار. ءار اتالىمنىڭ جەڭىمپازىنا 5 ميلليون تەڭگەدەن جۇلدە تاعايىندالعان. سونىمەن بىرگە «ۇزدىك كوميكس» جانە «ۇزدىك كىتاپ» نوميناتسيالارى العاش رەت وتكىزىلىپ وتىر»، - دەدى ق ر مادەنيەت جانە سپورت مينيسترلىگى ارحيۆ جانە قۇجاتتامانى باسقارۋ كوميتەتىنىڭ ءتوراعاسى قۋات بوراش ورتالىق كوممۋنيكاتسيالار قىزمەتىندە.
بايقاۋعا وتىنىمدەر aiboz@kitap-palatasy.kz ەلەكتروندى مەكەنجايىنا 2022-جىلعى 15- ماۋسىمنان 1- قازانعا دەيىن قابىلدانادى.
«مۇنداعى باستى تالاپ - جاڭا دۇنيەلەر عانا قابىلدانادى، شىعارما بۇرىن-سوڭدى ەش جەردە، الەۋمەتتىك جەلىلەر مەن گازەت-جۋرنالداردا جاريالانباعان بولۋى ءتيىس. ەكى ايدا بايقاۋعا 150 دەن استام ەڭبەك كەلىپ ءتۇستى. كوپتەگەن ەڭبەكتەردىڭ قۇجاتتارى دۇرىس بولماعاندىقتان، ولاردى قايتارىپ، تۇزەتىپ قايتا جىبەرۋگە مۇمكىندىك بەرىپ جاتىرمىز. سۇرانىس وتە كوپ، ءبىر اۆتوردان 4-5 ەڭبەك كەلەتىن ساتتەر دە بار. قىزىعۋشىلىق تانىتقاندار كۇن سايىن ارنايى تەلەفونىمىزعا حابارلاسىپ جاتىر. نەگىزگى ەڭبەكتەردىڭ ءبارى قىركۇيەك ايىندا كەلەدى دەپ ويلايمىز»، - دەدى ۇلتتىق مەملەكەتتىك كىتاپ پالاتاسىنىڭ ديرەكتورى ءادىل قويتانوۆ.
سونىمەن بىرگە، سپيكەردىڭ ايتۋىنشا، بايقاۋعا قاتىسۋشىلاردىڭ جاسىنا ەش تالاپ قويىلمايدى. ءار نوميناتسيادا ءبىر عانا جەڭىمپازعا 5 ميلليون تەڭگە تابىستالادى.
«مىسالى جاقىندا 13 جاسار بالا حابارلاسىپ، ءوز شىعارمالارىن جىبەردى. ارينە، ءبىز وعان رۇقسات ەتتىك. ءبىزدىڭ بايقاۋعا 13 جاسار بالادان مەملەكەتتىك سىيلىق لاۋرەاتى بولعان كىسىلەر دە قاتىسىپ جاتىر. نەگىزىنەن پروزا، پوەزيا، بالالار ادەبيەتى جانرلارىنا ءوتىنىم كوپتەپ تۇسۋدە، كىتاپ ديزاينى بويىنشا دا قاتىسۋشىلار كوپ، كوميكستەر ازىرگە از»، - دەدى ءادىل قويتانوۆ.
ايتا كەتەيىك، ادەبي سىيلىق جەڭىمپازدارعا جىل سوڭىندا تاپسىرىلادى. كونكۋرس ناتيجەسىنەن سوڭ جەڭىمپازداردىڭ ەڭبەكتەرى 500 دانامەن جارىق كورەدى.
بايقاۋدىڭ تولىق ەرەجەسى مەن تۇجىرىمداماسى http://kitap-palatasy.kz/ سايتىندا جازىلعان.
