پاتەر يەسى جالعا الۋشىدان دەپوزيت سۇراۋى قانشالىقتى زاڭدى - مامان جاۋابى
بۇل ساۋالدارعا ونلاين بريفينگ بارىسىندا قازاقستان بىرىككەن ريەلتورلار قاۋىمداستىعىنىڭ مۇشەسى ورىنباسار ساتايەۆ جاۋاپ بەردى، دەپ حابارلايدى قازاقپارات ءتىلشىسى.
سپيكەردىڭ سوزىنشە، جالعا الۋشىلار الدىمەن مىنانى ءتۇسىنۋى كەرەك. الدىن الا تولەم باسقا، دەپوزيت - باسقا تولەم.
«ارينە، جازباشا كەلىسىمشارتتىڭ بولۋى ەكى تاراپتى دا قورعايدى. كەلىسىم-شارتتىڭ پاريتەتتىك بولۋىن قامتاماسىز ەتۋگە، ونىڭ ءاربىر تاراپ ءۇشىن تەڭ قۇقىقتار مەن مىندەتتەرگە يە بولۋىنا ۇمتىلۋ قاجەت. كەپىلدىك تولەم (دەپوزيت) ەكى جاقتىڭ كەلىسىمىنە بايلانىستى جاسالادى. كوبىنە ونىڭ سوماسى جالعا بەرىلەتىن پاتەردىڭ ءبىر ايلىق اقىسى مولشەرىندە بولادى. سونىمەن قاتار، پاتەردىڭ تۇرعان جەرىنە، ىشىندەگى جيھازعا تىكەلەي بايلانىستى. مەنىڭ ويىمشا كەپىلدىك تولەم بولۋى كەرەك. مىسالى، جالعا الۋشى كوممۋنالدىق شىعىندى تولەمەسە، قىمبات جيھازدى بۇلدىرسە پاتەر يەسى سول سومادان ۇستاپ قالۋعا قۇقىلى. ەگەر جالعا الۋشىمەن كەلىسىم شارت توقتاتىلسا جانە ءبارى دۇرىس بولسا مەنشىك يەسى دەپوزيتتى قايتارۋعا مىندەتتى»، - دەدى ول.
ايتۋىنشا، پاتەردى جالعا الۋشىلاردىڭ باسىم بولىگى الدىن الا تولەم جاسايدى. وزدەرىنە ۇناعان باسپانادا ۇزاق ۋاقىت تۇراقتاپ قالۋ ءۇشىن التى نەمەسە ءبىر جىلعا دەيىن تولەپ تاستايدى. بۇل دا كەلىسىم شارتتا كورسەتىلەدى.
