استانا مەترو ىسىنە قاتىستى الدىن الا تىڭداۋ باستالدى
ولارعا قاتىستى ۇكىم بۇعان دەيىن كۇشىن جويعان ەدى، دەپ حابارلايدى قازاقپارات ءتىلشىسى.
الدىن الا تىڭداۋ نۇر-سۇلتان قالالىق قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتىر.
ەسكە سالساق، ەلورداداعى LRT نىڭ قۇرىلىسى 2019-جىلى ساۋىردە توقتاتىلعان ەدى.
2020-جىلدىڭ قاڭتارىندا LRT قۇرىلىسىنا قاتىستى ءىستى تەرگەۋ شارالارى اياقتالدى.
سول جىلى قازاندا استانا LT LRT كومپانياسى بويىنشا ءىس سوت قاراۋىنا جولداندى.
سونداي-اق، بيىل 13- تامىزدا نۇر-سۇلتان قالاسىنىڭ پروكۋراتۋراسى ەلوردا اكىمىنىڭ بۇرىنعى ورىنباسارى قانات سۇلتانبەكوۆ پەن «استانا LRT» ج ش س باسقارما ءتوراعاسى تالعات اردانعا قاتىستى قىلمىستىق ءىستى سوتقا جولداعانى تۋرالى حابارلادى. ءبىراق، اتالعان ەكى كۇدىكتى قازىرگى ۋاقىتتا قىلمىستىق قۋدالاۋدان بوي تاسالاپ ءجۇر.
ايتا كەتسەك، مەملەكەت باسشىسى قاسىم-جومارت توقايەۆ بيىل 11- قاڭتاردا وتكەن ءماجىلىس وتىرىسىندا ەلورداداعى LRT قۇرىلىسى تۋرالى پىكىر ءبىلدىردى.
«كوپشىلىكتى، اسىرەسە ەلوردا تۇرعىندارىن اشۋلاندىراتىن تاعى ءبىر ماسەلە - LRT قۇرىلىسى بولىپ وتىر. ول كادىمگى ينفراقۇرىلىمدىق جوبادان ەلدىڭ ابىروي-بەدەلىنە نۇقسان كەلتىرەتىن كۇردەلى پروبلەماعا اينالدى. قازىردىڭ وزىندە وراسان زور قاراجات جۇمسالدى، قارىزدار تارتىلدى، شەتەلدىك ارىپتەستەر الدىندا اۋقىمدى كەلىسىمشارتتىق مىندەتتەمەلەر قابىلداندى. بۇل جوبا باستاپقىدا-اق ۇلكەن قاتەلىك بولدى، ونى مويىنداۋ كەرەك. سونىمەن قاتار، بۇل سىبايلاس جەمقورلىقتىڭ ءيىسى مۇڭكىپ تۇرعان جوبا»، - دەگەن ەدى پرەزيدەنت.
